Отандық өндірушіге өтемақы беріледі

Бүгінде елімізде отандық өнім өндірушіні қолдау мен ынталандырудың бірқатар тәсілдері қолданылып жүр. Солардың бірі – отандық тауарлар, жұмыстар мен қызметтерді нарыққа ұсыну барысында индустриялық-инновациялық жаңалықтарды қолдануға жұмсалған шығынды өтеп беру. Бүгінгідей заманауи технологиялардың көз ілеспес шапшаңдықпен дамуы мен жарысы заманында мұндай қолдаудың маңызы зор екені сөзсіз. Ең алдымен ол өз өнімдеріміздің бәсекеге қабілетін арттырады. Биыл «NADLoC» жергілікті қамтуды дамытудың ұлттық агент­тігіне осындай өтемақы ал­­ғы­­сы келген 132 өтініш түс­кен екен. Оларды қараған ведом­с­т­во­аралық комиссия кеше 82 өтінішті қана­ғат­­тандырды. Қалғандарына келесі қаржы­лық жылда өтем­­­ақы төлеу көзделе­ді. Өз өнер­­кә­сі­біне заманауи жаңа­лық ен­­гіз­гені үшін отандық өнім өн­­ді­ру­шіге төленетін биылғы жал­­пы сома 120 млн. теңгені құрайды. Өтініштер 25 наурыздан 30 маусымға дейін қабылданған болатын. Өтемақы алатын ком­па­ниялардың тізімі аталған агент­тіктің ресми веб-сайтында жарияланады. Бұл атқарушы тараптың қолдауды мейлінше ашық жүргізуге ынталы екенін көрсетсе керек. Айта кету керек, өтемақы ин­­­­дус­­трия­лық-инновация­лық қыз­­­мет үшін жұмсалған 50 па­­йыз­­­дық шығын тиісті құжат­та­р­­­мен расталған жағдайда өтеледі. Бірақ 3 мың айлық есеп­тік көрсеткіштен аспауы керек. Сонымен қатар, мұн­дай өтема­қыны Қазақстан Респуб­ли­ка­сының «Техникалық реттеу туралы» заңына сәйкес Қазақ­стан Республикасының аумағында тұтынуға жіберілген және Мемлекеттік техникалық реттеу жүйесі реестріне енгі­­зіл­ген тауар сапасын халық­ара­лық стандарттарға сәйкес­тігін растаған отандық тауар өн­дірушілер мен қызмет көр­сетушілер ала алады. Осылайша, еліміздегі индус­т­рия­лық-инновациялық қыз­метке қолдау жыл сайын артып келеді. Атап айтқанда, «Ин­дус­триялық-инновациялық қызметті мемлекеттік қолдау туралы» Заң 2012 жылдан бері жұмыс істеп тұр. Өткен жылы өндіріске жаңа технологияларды енгізуді кезең-кезеңімен дамытуды көздей­­тін бағдарлама өз жұмысын бастады. Сондай-ақ, Елбасы­ның 5 инс­­­титуттық реформа­сында да бұған баса назар аударыл­ған. Бүгінде қарқынды жүр­гізілген осындай саясаттың нәтижесінде Қазақстан бұрынғы шикізат өндіруші ел ретіндегі атынан арылып, әлемдік нарыққа өз өнімдерін шығаруға қабілетті ел екенін дәлелдей бастады. Жандос  Бәделұлы, «Егемен Қазақстан»