Бағдарлама уақтылы орындалуы тиіс

Кеше Үкімет үйінде Премьер-Министр Кәрім Мәсімов «Нұрлы Жол» мемлекеттік бағдарламасын жүзеге асыру мәселелері жөнінде кеңес өткізді. «Нұрлы Жол» мемлекеттік бағдарла­масы хабтық қағидат бойынша тиімді инфрақұрылым құру негізінде еліміздің макро­өңірлерін ықпалдастыру арқылы бірыңғай экономикалық нарық қалып­тастыру үшін жүзеге асы­рылады. Нәтиже­сінде, ол жұмыс орындарын құруға, Қазақ­стан­ның ұзақмерзімді экономикалық өсімін қамтамасыз етуге, сондай-ақ, сыртқы нарықтардағы ахуал­дың нашарлау жағдайында эконо­миканың жекелеген секторлары­на қолдау көрсету бойынша дағ­дарысқа қарсы шараларды жүзеге асыруға бағытталған. «Нұрлы Жол» бағдарламасын жүзеге асырудың негізгі көрсет­кіштері туралы Ұлттық экономика министрінің орын­басары Марат Құсайынов баян­дады. Оның мәліметінше, бағдар­лама аясын­да автожол саласын дамытуға бөлін­ген 59,2 млрд. теңге қаражат толық игерілді. «Білім беру саласында инфрақұрылымды дамыту» бағыты бойынша қаржы­ландырудың 60,9 млрд. теңгесі жылдық жоспар кезінде игеру 22,3 млрд. теңгені құрады. Сонымен қатар, инженерлік-коммуни­кациялық инфрақұрылым салуға 2016 жылы 78,5 млрд. теңге қа­рас­тырылған. 2016 жылғы 25 шіл­де­дегі жағдай бойын­ша, қар­жы­ландыру жоспарына сәйкес 30,5 млрд. теңге бөлінген, оның 28,1 млрд. теңгесі немесе қаржы­лан­дыру жос­парының 92% игерілді. Толық игерілмеу Алматы, Жамбыл, БҚО, Қостанай, СҚО, ОҚО және Астанада күтілуде. Білім және ғылым министрі Ерлан Сағадиев айтып өткендей, қазіргі таңда 96 білім беру нысан­дарының (77 мектеп және 19 ба­ла­бақша) құрылысы жүріп жа­тыр, алайда, мұнда да бірқатар об­лыстарда қаражаттың толық игеріл­меу қаупі бар. Жұмыс кеңесінің қорытын­дысы бойын­ша Премьер-Министр Үкімет мүшелеріне бағдар­ла­ма­ны жүзеге асырудың уақ­ты­лы орындалуын және бөлін­ген қа­ражатты толық игеруді бақылауды қамтамасыз етуді тапсырды. «Егемен-ақпарат»