Экскаваторшыға автокөлік сыйлады

Еуразиялық Топ (ERG) құрамына кіретін «Қазақстан алюминийі» АҚ филиалы – Керегетас әктас кеніші жуырда 50 жылдық мерейтойын атап өтті. Кеніште Майқайың, Баянауыл, Екібастұздың жастары еңбек етуде. Баянауылдың өзінен 200-дей адам кенішке жұмысқа тұрыпты. Олар тау-тас қопарып ұзақ жылдар бойы кеніште жұмыс істеп жүрген кенші ағаларының жолын жалғастыруда. Мерейтойлық жиын әктас өндіретін кеніштің өсіп-өркендеуіне өмірлерін арнаған кәсіпорын жұмысшыларының, кеншілердің басын қосып, лайықты мерекелік күн арнап, сыйлықтар, марапаттар тарту етті. Мысалы, кеніштің экскаватор машинисі Қабиден Ахметовке «Қазақстан алюминийі» АҚ президенті Арман Есенжолов «Лада Приора» автокөлігінің кілтін табыстады. Қабиден ағамыз да 30 жыл бойы кеніште еңбек етіп келеді екен. Қандай қиындықтар кездессе де кенші жұмыс орнын ауыстыру туралы мүлде ойланбапты. Фарида БЫҚАЙ, «Егемен Қазақстан» ПАВЛОДАР