Қайтқан көлікте қайыр бар

Зауыттан сонау 1935 жылы шыққан Mercedes-Benz 500K Special Roadster-1935 автокөлігі аукцион арқылы сатылмақ. Бұл көліктің коллекциялық құндылығын айтпағанда, тарихының өзі жұртшылықтың қызығушылығын тудырып отыр. «Родстер» деп қысқар­тылып айтылатын көлікті Ганс Прим деген неміс 1935 жылы сатып алған. Екінші дүниежүзілік соғыс кезінде иесі тұтқынға алынады. Сөйтіп, соғыс аяқталар тұста бар болғаны 500 данамен шыққан, көздің жауын алатын қымбат көлікті америкалық солдаттар АҚШ-қа алып ке­тіпті. 2011 жылы гол­лан­диялық коллекционер Франс ван Харе  көлікті 3,7 миллион дол­ларға сатып алып, Еуро­паға қайта әкеледі. Ван Харе қымбатқа алған көлігін жұртқа көрсетпек болып, Германияда өтетін классикалық маши­на­лар­дың көрмесіне апа­рыпты. Сөйтсе, жер­гілікті полицейлер оның меншігінің заңдылығына күмән келтіріп, көлікті тәр­кі­лейді. Бұл оқи­ға­ның соңы үлкен дауға айналып, ақыр соңында сот «Род­стерді» 70 жыл бұрын АҚШ-қа заңсыз әкеткен деген шешім шығарды. Сөйтіп, арада талай жыл өткенде, жұмыр жердің жартысын шарлап шыққан көлік кезінде зауыттан сатып алған Ганс Примнің бүгінгі ұрпақтарына берілді. Енді қожайындары 70 жылдан кейін қайтарып алған көлікті аукцион арқылы сатып, шамамен 7 миллион еуро пайда көруді жоспарлап отыр. Арнұр АСҚАРОВ, «Егемен Қазақстан»