Оқалы киім киемін деп...

«Өткенде қызық та өкініш­ті оқиға болды. 19 жастағы жігіт елді алдағысы келіпті. Сөйтіп, иығында полиция кіші сержантының погоны ілінген киіммен «Насиха» сау­да орталығына алшаңдай басып кіріпті. Сол сәтте оны сауда орталығының қауіпсіздік қызметін басқаратын Асхат Құсайынов сырттай бақылауға алыпты. Кезінде ішкі істер органдары саласында қызмет еткен, бүгінде зейнеткер А.Құсайынов полиция кіші сержантына жақындап, одан қызметі туралы сұрай бастайды. Әңгіме барысында полиция кіші сержантының қызметтік куәлігінің жоқтығы белгілі болады. Бұл, әрине, бұрынғы полиция қызметкері А.Құсайыновтың күдігін одан сайын ұлғайтып, сол бойда «102» нөміріне қоңырау шалады. Оқиға орнына келген Атырау қалалық ІІБ жол-патурльдік полиция экипажы күдікті жігіттің ішкі істер органдарына ешқандай да қатысы жоқ екендігін анықтайды. Тексеру барысында күдіктінің жыл басынан бері жол ережесін бұзғаны және ұсақ бұзақылық жасағаны үшін екі рет әкімшілік жауапкершілікке тартылғаны белгілі болды. Сөйтіп, қайран жігіт, ішкі істер қызметкерлерінің қоғамдық орындарға жиі киіп келе бермейтін оқалы киімін киемін деп, опық жеді. Жолдасбек ШӨПЕҒҰЛ, «Егемен Қазақстан» АТЫРАУ