Астана қалалық штабы құрылды

Кеше «Нұр Отан» ХДП Астана қалалық филиалында  Қа­зақ­стан Республикасы президенттігіне кандидат Н.Назар­баев­ты қолдау жөніндегі қалалық қоғамдық штабтың тұсаукесері болды. Ол 12 ақпанда құрылған рес­публикалық қоғамдық штабтың филиалы болмақшы. Тұсаукесер рәсімін «Нұр Отан» ХДП Астана қалалық филиалы төрағасының бірінші орынбасары, штаб төр­ағасы Әмірхан Рахымжанов ашып, жүргізіп отырды. Штаб­тың басты мақсаты президенттікке кандидат, «Нұр Отан» ХДП Төрағасы Нұрсұлтан Назар­баев­тың сайлау науқанына бірегей қолдау көрсету, оның сайлауалды тұғырнамасын насихаттау жөнін­дегі үгіт-насихаттық іс-шаралар өткізу, деді ол өзінің кіріспе сөзінде. Бүгін штаб мүшелерінің бәрін жинап, жұмыс жоспарымен таныстырамыз. Штаб бөлімше­лерінің, қоғамдық жылжымалы қабылдаулардың қайда болаты­ны, барлық орналасқан жерлері бүгін айтылатын болады. 3 нау­рыздан бастап ресми түрдегі насихат жұмыстары басталатыны белгілі. Біз сол уақыттан бастап ха­лықпен жиі кездесіп, үгіт-на­сихат өнім­дерін таратумен қатар, қабыл­даулар өткізетін боламыз. Астана қалалық қоғамдық штабы­ның құрамы 19 адамнан тұ­рады. Олардың қатарында партия белсенділері, ардагерлер, этно­мәдени бірлестіктер, ҮЕҰ басшы­лары және т.б. бар. Жұ­мыс­шы органы алты бөлімнен тұрады. Со­ның ішінде ұйым­дастыру, заң­гер­лік, қаржылық, ма­териалдық-техникалық қам­сыз­дандыру, бас­па­сөз және қоғам­дық қабылдау бө­лімдері бар. Бүгінгі таңдағы қызу жұмыс Н.Назарбаевтың президенттікке кандидаттығын қол­дау­ға қол жинау болып отыр екен. Штаб төрағасының айтуына қара­ған­да, қаладан 20 мыңнан артық қол жиналуға тиісті. Одан әрі президенттікке кандидаттың сенімді өкілдерін іріктеу, партияның сайлау учаскелеріндегі бақылаушы­ларын анықтау және т.б. толып жатқан шаралар кетеді. Міне, осындай көзге көрінбесе де, маңызы  зор қыруар шаруамен  штаб қызу айналысатын болады. Жақсыбай САМРАТ.