Дараланған Данияр

ел сенімін ақтап, чемпион атанды Кеше газетімізде Олимпиаданың бір күнін қорытындылап берген мақаламызда боксшылар Данияр Елеусінов пен Әділбек Ниязым­бетовтің финалға шыққанына қуаныш білдіргенбіз. Сол Данияр кеше ерледі. Жалпы, оның құбылыс екен­дігі Лондон Олимпиадасында айтылған еді. Белгілі бокс маманы Юрий Цхай: «Дүние жүзінен жиналған бокс мамандарының арасында бүгінгі мықты қолғап шеберлері туралы көп әңгіме болады. Сонда олар Данияр Елеусінов туралы ерекше пікір білдіреді. Қазіргі бокс кәсіпқойлардың төбе­лесіне ұқсап барады. Елеусінов бокс­тың ұлы өнер, үлкен мәдениет екен­дігін өзінің ұрыс мәнерімен дәлел­деген дара боксшы, ол ұзаққа бара­ды», деп бізді қуантқан. Бірақ, сол жолы ағасы Серік Сәпиев алтын­­нан олжа салды. Вэл Баркер Кубо­гін елге әкелді. Біз Даниярдың жұл­дыз­ды сәтін күттік. Тек қасын­дағы бокс­шылар ғана емес, бүкіл ел сенді. Бүгін сол үміт ақталды. Рио Олим­пиадасының 69 кило салмақ­қа деп арнайы соққан сом алтын медалі біздің батыр жігіттің қолында. Бірақ алтын жүлде оңай берілген жоқ. Жартылай финалда қарсыласының басы кездейсоқ тиіп, қабағы жарақаттанып қалған еді. Кешірек бас жаттықтырушыға хабар­лас­қанымызда: «Екі жерден тіктірдік. Жарақаты ауыр, дәрігерлерден қауіптеніп отырмыз. Әйтпесе, Данияр тас-түйін дайын», – деген. Қарсыласы өзбекстандық Шахрам Гиясов – өте мықты бокс­шы. Соққысы ауыр. Финалға дейін талай мықтының кеудесін басты, жарыс жолынан шығарып тастады. «Алтынның» шеті көрініп тұрғанда, жанын неге аясын! Оның үстіне, Елеусіновтің ауыр жарақаты бар, дәл сол жерден ұра берсе, дәрігерлер жарыстан алып тастайды ғой. Ішінде тағы басқа қандай қиял болғанын білмесек те ойын осылай жобаладық. Солай болып шықты. Шахрам­ның жақыннан ұрыс салғанда, сол жарақатқа қатты ұруды көздеп жүргені белгілі болды. Әйтпесе, оңайлықпен соққы дарытпайтын Данияр шегіне ұрыс салып шалдырмай кетеді. Шахрамды бұл үшін жазғыра алмайсың. Бапкерінің де таңған тактикасы осы. Данияр өте сезімтал, қарсыласының ұрған соққысының қай шамаға жететініне дейін шайқасып жүріп, есептеп үлгереді. Шахрамның дөп тисе, атан өгізді мұрттай ұшыратын соққы­лары Даниярдың иегіне иненің жасуындай қашықтықта тимей жатты. Негізінде, Даниярдың шегініп ұрыс салуы қарсыласынан қаймығу емес, ауыр соққыларға шалдырмайтын тактикалық қаруы. Қандайда мықты қарсылас болсын, мұндай бопсаға шыдай алмай, жіптей тартылып тұрған жүйкесі сыр бере бастайды. Соққылардан жалтарып қана қоймай, өзі ауыр жұдырықтармен көміп тастайтын Даниярға есесі кеткен Шахрам өршелене алға ұмтылды. Екеуі де былайғы өмірде сыйлас болғанымен, өзі үшін де, өзіне сенген халқы үшін де өліспей беріспейтін ұрыс салып жүр. Соңғы раундта Шахрам жеңіліп жатқанын сезіп, бар күшін салды. Біздің жігіт сынаптай сырғып, жеткізбей жүр. Жанасқан сәтте қолы алмас қылыштай жарқ ете қалады. Күмән­сіз жеңді: үш төре­ші де Данияр жеңді деп таныған. Сөйтіп, Даниярдың ғана емес, біздің де арманымыз орындалды. Көптен бері қабағы жауар бұлт­­­тай түнеріп жүрген бас жат­тық­тырушы Мырзағали Айт­жанов­тың да ашуы басылыпты. Біз бүгін­гі жекпе-жектің түйінін тарқа­ту­дың мәнісін сұрадық. – Данияр Елеусінов – команда капитаны болғандықтан, оған артылған жауапкершілік жүгі ауыр, – деді ол. – Сондықтан, та­ңер­­­тең­гілік команданың барлық мүше­­сі жиналып, Даниярдың атына салмақты сөздер айтты. Олар Елеусіновтің қарсыласынан мықты екендігі, Гиясовпен қалай айқас өткізудің жолдары таразыланып, барлығы үшін капитан жеңіске жетуі керек деген жүрекжарды тілектер білдірді. Біздің бокс спорты тарихында әлем чемпионының Олимпиялық ойындар чемпионы болуын Серік Сәпиев бастап беріп еді. Одан кейін, міне, Данияр осы жетістікті қайталап отыр. Шахрам да жігіттің төресі екен. Бас­­пасөз кон­­фе­рен­­­ция­сында Да­ниярға үлкен құрмет­пен қарай­тын­­дығын айтты. «Бұл өте мық­ты жекпе-жек болды. Үшінші раундта күшім жетпей қал­ды. Бірақ, кім қалай десе де біз түбі бір туысқан халық­пыз, сондық­тан туыс­қан қазақ халқын тағы бір алты­ны­мен құт­тықтаймын», деді. Осылайша тағы бір жақсы күн артта қалды. Бұл күні тамаша жетіс­тік­терге қол жеткізген балуанымыз Эль­мира Сыздықова қола медаль­дың ауылына ат ойнатып келді. «Егемен Қазақстанның»  арнаулы тілшісі Бақтияр ТАЙЖАН Рио-де-Жанейродан хабарлайды Суретті түсірген Данияр МАЙЛЫБАЕВ