Қоғамдық қабылдау өткізді

Парламент Мәжілісінің депутаты Жәмила Нұрманбетова «Нұр Отан» партиясының Астана қалалық филиалында қоғамдық қабылдау өткізді, деп хабарлады Мәжілістің баспасөз қызметі. Қоғамдық қабылдау жұмысы барысында барлық өтініш білдірген азаматтарға құқықтық кеңес беріліп, білім беру, халықты жұмыспен қамту және басқа да әлеуметтік маңызды мәселелердің заңнамалық нормалары түсіндірілді. «Өздеріңіз білетіндей, біз халықтың әлеуметтік осал санатындағы жандарды әлеуметтік қорғауға үлкен мән бере­міз. Біз мұқтаж адамдарға қолдау және көмек көрсетуіміз керек. «Нұр Отан» пар­тиясы Астана қалалық филиалы қоғам­дық қабылдау бөлмесінде Қазақстан Респуб­ликасы заңнамаларының шеңберінде құ­қықтық көмек көрсетіліп, кеңес беріледі. Қажет жағдайда берілген өтініш мазмұнын қарауға өкілетті мемлекеттік және жер­гілікті атқарушы органдарға хаттар жі­беріледі», – деді Мәжіліс депутаты. Қоғамдық қабылдау бөлмесінде соңғы жеті айда 300-ден астам қоғамдық қабылдау жүзеге асырылса, оның 56-сын Парламент Мәжілісінің депутаттары С.Қ.Ахметов, П.О.Казанцев, Қ.С.Мусин, С.Ф.Бычкова, Ж.Н.Нұрманбетова, Т.И.Яковлева өткізіпті. «Нұр Отан» партиясы Астана қалалық филиалының қоғамдық қабылдау бөл­месінде Астана қаласы әкімінің орынба­сарлары, басқармалар, департаменттер мен құқық қорғау органдарының басшы­лары азаматтарды тұрақты түрде қабыл­дау жұмысын жүргізеді. Бұл жерде адамдар өз сұрақтарына татымды жауап және кеңес ала алатын болғандықтан, өтініш біл­діруші астаналықтардың саны артып келеді.