Жеңімпаздар жолы жалғасады

Астанада Ұлттық Олимпиада комитетінің президенті Тимур Құлыбаев пен Мәдениет және спорт министрі Арыстанбек Мұхамедиұлы Олимпия ойындарының чемпиондарымен және жүлдегерлерімен кездесті. Кездесуге спортшылармен бірге жаттықтырушылар, Олим­­пиадаға еліміздің делега­циясының құра­мын­да барған спорт мамандары қатысты. Кездесуде ҰОК президенті мен Мәдениет және спорт министрі отандастарымызды жеңістерімен құттықтап, Олимпиадаға қатысты өз ойларын ортаға салды. Онда алдымен Ұлттық Олимпиада коми­тетінің басшысы сөз алып, спорт­шыларға ризашылығын білдірді. – Сіздерді Олимпиаданың сәтті аяқталғанымен құттықтаймын. Олимпиада біздің спортшылар үшін ел намысын абыроймен қор­ғап, отансүйгіштігімізді көр­сететін жарыс алаңы болды. Спортшыларымыздың жеңісі елімізде спортты дамытуда тиісті жұмыстардың жасалып жатқанын көрсетті. Қазақстан Олимпиадада ешқашан 17 жүлде алып көрген емес. Сіздер жарыс алаңында намысқа тырысып, осы медальдарды жеңіп әкелдіңіздер, – деді ол. Осыдан кейін Мәдениет және спорт министрі сөз алып, спорт­­­шылар мен жаттықтыру­­шы­­лардың еңбегін, ұлттық құра­­ма­­ның жарысқа жақсы дайын­дал­ғанын, сол үшін Ұлттық Олим­пиада комитеті мен жат­тық­тырушылардың осы іске басы­нан соңына дейін араласқан басқа да спорт мамандарының еңбегін бас бармақпен бағалай­тынын айтты. Келесі кезекте сөз Олимпиада чемпиондары мен жүлдегерлеріне берілді. Алдымен боксшы Данияр Елеусінов мінберге шығып, ҰОК президентіне Олимпиадада ғана емес, оған дайындық кезінде де көрсеткен қолдауына алғыс білдірді. Одан кейін Олимпиада­да алған әсері туралы жүзгіш Дмитрий Баландин де айтып берді. – Финалда жүзіп болғаннан кейін, таблоға қарасам, ешнәрсе түсінбедім. Қателік болған шы­ғар деп ойладым. Содан кейін ғана құрмет тұғырына шық­қанда жеңіске жеткенімді сезін­дім. Сол жерде еліміздің Ән­ұра­ны шырқалып, көк Туымыз көтеріл­генде, бойымды барлық Қазақстан халқы үшін мақтаныш сезімі кернеді. Бұл сезімді жеткізу қиын. Қазақстанға сондай сезім­ді сыйлағаныма қуандым. Жеңіс тұғырында еліміздің көк байра­ғының өзгелерден биік тұрғанын мақтан тұттым, – деді Олимпиада чемпионы. Әйелдер күресінен күміс жүлдегер Гүзел Манюрова да Олимпиададағы спортшы­лары­мыздың жеңісі бүкіл еліміз­дің ортақ жеңісі екенін атап өтті. Осыдан кейін бокстан ұлт­тық құрама команданың бас жат­тық­тырушысы Мырзаға­ли Айт­жанов сөз алып, жарыс­та бол­ған бәсекелестік туралы айтты. Жиынның соңында Олим­пиадада баспасөз орталығының жетекшісі қызметін атқарған Бақытжан Ордабаев Олимпиада жаңалықтарын беріп, репортаж жа­саған журналистердің жұ­мы­сын жоғары бағалады. Дастан КЕНЖАЛИН, «Егемен Қазақстан»