Достық үйіндегі дидарласу

Облыстық Достық үйінде Семей ядролық сынақ полигонының (СЯСП) жабылуына 25 жыл толуына орай арнайы шара болып өтті. Оған ядролық сынақ полигоны ар­дагерлері мен мүгедектері, локалды соғысқа қатысушылар, мемлекеттік органдар мен үкіметтік емес ұйымдар өкілдері қатысты. – Биылғы жылды аса маңызды белес деуге болады. Еліміз Тәуелсіздігінің 25 жылдығы қарсаңында көптеген ауқымды шаралар ұйымдастырылуда. Солардың қатарында Семей ядролық сынақ полигоны жабылуының 25 жылдығы да бар. Қазақстан Республикасының Президенті Нұрсұлтан Назарбаевтың 1991 жылдың 29 тамызындағы СЯСП жабу туралы Жарлығы аса маңызды шешімдердің бірі болып табылады. Осы күні ядролық полигон  тарихында жаңа дәуір басталды. Елбасының бастамасымен Қазақстан ядросыз әлем құрудағы көшбасшы ел ретінде танылды, – деп атап өтті облыстық ішкі саясат басқармасының басшысы Ербол Нұрғалиев. Жергілікті атқарушы органдар осы санаттағы адамдардың құқықтары мен мүдделерін қорғау бағытында барлық шараларды қолға алып келеді. Ел заңнамалары мен әлеуметтік қолдау бағдарламаларында көзделген шараларды жүзеге асыруға бағытталған жұмыстар жүргізілуде. Мысалы, мәслихаттардың шешімдерімен Ұлы Отан соғысына қатысушылар мен мүгедектеріне теңестірілген адамдарға Жеңіс күні қарсаңында Ақтөбе қаласы бойынша 32 айлық есептік көрсеткіш немесе 67 872 теңге, аудандарда 50 мың теңгеден өтемақы төленді.   Қалалық мәслихат депутаттарының шешімдері бойынша, 2013 жылдан бері ҰОС қатысушылары мен мүгедектеріне теңестірілген адамдарға коммуналдық төлемдерге жылу маусымы кезеңінде 1,7 АЕК (3605 теңге) төленеді, еліміздегі санаторийлерге тегін жолдамалар беріледі. Шара барысында СЯСП жабылуының 25 жылдығына орай, ардагерлерге облыс және қала басшыларының Алғыс хаттары табысталды. Сатыбалды СӘУІРБАЙ, «Егемен Қазақстан»  Ақтөбе облысы