Инвестицияны икемді ел иемденеді

Әлем экономикасы әлі де болса тұрақтылыққа табан тірей алмай тұрғаны бел­гілі. Соның салдарынан қай елде де тікелей шетел инвес­ти­циялары ағымының бәсең­деу үрдісі байқалады. Тіпті, инвес­тициялар үшін үлкен бәсе­келестік жүруде. Ал бұл ретте инвес­торлар алды­мен инвес­тицияға ең икемді елді таң­дайтыны белгілі. Осы­ған орай біздің Үкімет те ахуалды жақсарту үшін бел­сенді жұмыс жүр­гізіп, инвес­тициялардың қауіп­сіздігі мен сақталуын қамта­масыз етуде. Бұл туралы кеше Президент жанындағы Орталық коммуникациялар қызметінде өткен баспасөз мәслихатында айтылды. Еліміздегі инвестициялық ахуал жайын арқау еткен баспасөз мәслихатына Инвестициялар және даму министрлігі Инвестициялар комитеті төрағасының міндетін атқарушы Руслан Тасбергенов, Президент жанындағы Шетел инвесторлары кеңесі қауымдастығының басқарма төрағасы Ульф Вокурка, «Экспорт және инвестициялар ұлттық агенттігі «Kaznex Invest» АҚ басқарма төрағасы Борисбий Жанғоразов және оның орынбасары Алмас Айдаров қатысып, атқарылып жатқан жұмыстардың бағытын, барысын баяндады. Мә­селен, елімізде Кәсіпкерлік кодек­с­інде инвестициялардың қауіп­сіздігіне және сақталуына кепіл­дік беретін ережелер бекі­тіл­ген. Ал инвестициялар сала­сындағы халықаралық құқықтық базаны жетілдіру шеңберінде Инвестицияларды көтермелеу және өзара қорғау туралы 48 келі­сімге қол қойылыпты. Сонымен қатар, инвесторлардың проблемалы мәселелерін тез арада шешу мақсатында үнқатысу алаңдары құрылған. Олар –Президент жанындағы Шетел инвесторлары кеңесі және Үкімет жанындағы Инвестициялық ахуалды жақсарту жөніндегі кеңес. 2015 жылы Инвестициялық омбудсмен институты құрылғаны белгілі. Ал ағымдағы жылы Үкімет жанынан Инвесторларды тарту және инвестициялық ахуалды жақсарту жөніндегі кеңес құрылды. Айтқандай, жүргізіліп жат­қан жұмыстар халықаралық сарап­шылар тарапынан да жоға­ры ба­ғалануда. Мысалы, Дүние­жү­зілік экономикалық форумның Жаһандық бәсекеге қабілеттілік туралы есебіне сәйкес, Қазақстан әлемнің 140 елінің арасында 42-орынға және ТМД елдері арасында екінші орынға ие болды. Дүниежүзілік банктің Doing Business рейтингінде Қазақстан 41-орынды иелене отырып, өзі­нің жайғасымын 12 тармаққа жақ­сартты. 189 ел арасында Дүние­жүзілік банк тобының Doing Business-2016 бойынша Қазақстан миноритарлық инвесторларды қорғау жөнінде 25-ші орынға және Жаһандық бәсекеге қабілеттілік рейтингісі бойынша инвесторларды қорғау бойынша 25-ші орынға ие болды. Инвестициялық ахуалды жетілдіру шеңберінде қа­былданатын ауқымды іс-шаралардың барлығы инвесторлар үшін қолайлы жағдай жасау және Қазақстанның өңірлік инвестициялық хаб ретінде қалыптасуы үшін енгізілуде. Динара БІТІКОВА, «Егемен Қазақстан»