Күй күмбірлеп, домбыра дәріптелді

Облыстық ішкі саясат бас­қармасы мен ха­лық шы­ғар­­­машылығы орталығы­ның ұйым­дастыруымен өт­кен «Дом­быра-fest» жастар фести­валін жұртшылық қызыға тама­шалады. «Абылай хан резиденциясы» мұражай-кешені алдын­дағы алаңда жүзден астам домбырашының басы қосылып, күмбірлете күйлер тартылды. Кәсіби музыканттармен қатар өз өнерлерімен танылып келе жат­қан жас таланттардың домбыра құлағында ойнаған шеберліктері жиналғандарды ерекше тәнті етті. Игілікті шараны ашу құрметіне өңірімізге танымал күйші, Білім беру ісінің үздігі Серікбай Құ­сайы­нов ие болды. Ыбырай Ал­­тынсарин медалінің иегері. Саналы ғұмырын ұрпақ тәрбиесіне арнап, тұңғыш домбырашылар сыныбын ұйымдастыруға ұйытқы болғаны және бар. Қадірменді ақсақал ұлттық өнерді насихаттау, жас ұрпақ бойына дарыту ісінен әлі күнге дейін қол үзген емес. Күй өнерін дәріптеуге арналған фес­тиваль Мағжан елінің жастары төл өнерді қастерлейтінін, қол үзбегенін тағы бір дәлелдеді. Оның аясында Данияр Құсанов, Марат Гайнуллин, Аслан Төке­нов секілді республикалық, аймақтық конкурстардың жеңімпаздары мен жүлдегерлері де күйден шашу шашып, қошеметке бөленді. Өмір ЕСҚАЛИ, «Егемен Қазақстан» Солтүстік Қазақстан облысы