Грант оқытушыларды ынталандырады

Тәуелсіздіктің алғашқы жылдарынан-ақ Елбасымыз елімізде білім мен ғылымның дамуына, оны қаржылан­ды­ру­ға ерекше көңіл бөліп келеді. Соңғы он жылда білім беруді  дамытуға жұмсалған қаржы он есеге артып, бұл көрсеткіш 2010 жылы ішкі жалпы өнім­нің 4,1 пайызына жақындады және бірқатар еуропалық ел­дердің деңгейіне жетті. Президент өзінің Қазақстан халқына биылғы Жолдауында білім беруді жаңғырту, оны  жаңа белеске көтеруге ерекше назар аударды. Өйткені, сапалы білім индустрияландыру мен инновациялық дамудың негізі болып табылады. Жуырда болып өткен Білім және ғылым министрлігінің алқа мәжілісінде сөз сөйлеген министр Бақытжан Жұмағұлов Білім беруді дамытудың 2011-2020 жылдарға арналған мемлекеттік бағдарламасын іске асы­ру аясында алғашқы рет мұ­ға­лім мәртебесін көтеру мәселесі көрініс тапқанын тілге тиек еткен болатын. Иә, бағдарламада, ең алдымен, педагогтардың мәр­тебесін көтеру, олардың біліктілігін арттыру, қаржылан­ды­рудың жаңа жүйесін енгізу, екіншіден материалдық әл-ауқатын арттыру арқылы ынта­ландыру, үшінші­ден, педа­гог­тардың беделін өсіру үшін ба­рынша ауқымды жұмыс­тар жүргізу көзделген. Білім беру ісінде министрлік тарапынан жоғары  оқу орын­дарында еңбек етіп жүрген оқы­тушылардың жағдайын жақ­сарту, олардың алаңсыз жұмыс істеуіне мүмкіндік беру, қолдау мақса­тын­да 2005 жылдан бері жүзеге асып келе жатқан үздік оқытушы мемлекеттік грантын белгілеудің ма­ңы­зы ерекше деп айта аламыз. Бұл сөз жоқ, жо­ғары оқу орын­дарының оқыту­шыларына деген үлкен көмек. Бұл грант ғылыми ізденістерде және педагогикалық қызметте бұдан да жоғары   көр­сет­­кіш­тер­ге қол жеткізуге, жұ­мыс­ты жүйелі, нақты жүргізуге жол ашады және педагог мәр­те­бесін көтереді. Оқытушылардың ал­дыңғы қатарлы оқу орын­да­рын­да тағылымдамалардан өту­ле­ріне және заман талабына сай болуына көмектеседі. Мемлекеттік грант оқытушылардың ғы­­лыми-зерттеу жұмыстары мен студенттерге сабақ берудегі әдіс-тәсілдерін жетілдіруге деген ынтасын арттыра тү­се­тіні сөз­сіз. Еліміздің білім беру дең­гейін көтеріп, сапа­сын арт­ты­руға бағытталған осы конкурс алдағы уақытта да жалға­сын тапқаны жөн деп ойлаймыз. Сейдехан ӘЛІБЕК, М.Әуезов атындағы ОҚМУ-дың факультет деканы, тарих ғылымдарының докторы. Шымкент.