Министрлік дәрілердің зияны туралы ақпаратты жоққа шығарды

Денсаулық сақтау және әлеуметтік даму министрлігі «дәрілік препараттар аллергиялық реакция туындатып, балалардың өлім-жітіміне себеп болды» деген ақпаратты жоққа шығарды. Біршама уақыт бұрын бұл ақпарат WhatsApp желісі арқылы кеңінен таралған болатын. «Денсаулық сақтау және әлеуметтік даму министрлігі дәрілік құралдардың жанама әсеріне тұрақты түрде мониторинг жүргізіп отырады. 2016 жылдың 19 қыркүйегіндегі мәлімет бойынша аллергиялық реакция туындатып, балалардың өлім-жітіміне себеп болды деген дәрілік құралдар (амоксициллин, капесула, ибупрофен (суспензия), алклофенак, ангисепт, сумамед, ингалипт, инфлюцид, балаларға арналған панадол және санасол) туралы ешқандай шұғыл мәлімет келіп түскен жоқ», делінген министрліктің ресми сайтында. Министрлік жұртшылықтың зәресін ұшырған ақпаратты таратушыларға қатысты Ішкі істер министрлігіне, Бас Прокуратураға және Ұлттық қауіпсіздік комитетіне шағым түсірген. Егемен-ақпарат