Ақан Сатаевтың жаңа фильмі көрсетілді

Алматыдағы Республика сара­­йын­да жылдың ең айтулы премье­ра­сы режиссер Ақан Сатаев­тың «Анаға апарар жол» фильмі­нің тұ­сау­кесер көрсетілімі өтті. Кеңес­тік кезеңдегі ұжым­дас­­тыру, сауат ашу кезеңінен бас­тап, ашар­шы­лық, үркіншілік, соғыс, сталиндік нәубет секілді қазақ ұлтының басына түскен қиын­дық­тарды тізбе­леп, тұтас бір дәуірдің сұлба­сын кино тілімен көрсеткен режис­сер­­дің ауқымды еңбегі баға­лау­ға тұ­рар­лық. Фильмнің бас­ты кейіп­кері Ілиястің өмір­ге кел­­ген күнінен бастап тарқаты­ла­тын оқи­ға­лар тізбегінің қай-қай­сысы да қазақ­қа жақын әрі түсі­нікті. Режис­сер кейіп­кердің басына түс­кен сынақ­тар­­дан өтуіне көмек­те­сетін ана ма­хаб­­ба­тының күшін оқиға қазығы етіп ала оты­рып, кейіп­кердің өр ру­хы­ның биіктігін, отан­ға деген сүйіс­­­пен­­шілігін, адам сен­гі­сіз жан­кеш­­ті­лігін көрсетуді мақсат еткен. Қызылдар құрған өкіметтің өктем­дігіне мойынсұна алмаған Ералы бай шекара аспақ болып бекі­ніп келгенінде, арқасүйер ағайыны ізінен ілеспек түгілі, өзіне қарсы тұрады. Адуынды бай ашу шақырып, қол­шоқпарлары қару кезеніп, қым-қуыт қақтығыс кезінде қаңғыған оқтан Ілиястің әкесі құрбан болады. Үрерге иті қалмаған ауылда аштықтың құрбаны болар деп қорыққан Ералы інісінің жалғыз тұяғын анасынан айы­рып, күшпен бөктеріп өзімен бірге алып кетеді. Одан әрі Түркия асып, кеме арқылы Украинаға жетіп, кеңес елінде өмірі қайта жалғасқанымен, бір қиын­дықтан екіншісіне тап болып, еріксіз еркіндігінен айырыл­ған Ілияс анасымен ұзақ жылдарға табыса алмайды. Ілияс – бір ға­сыр­дағы зұлматтың бәрін басы­нан кешіп, жанкештілікпен аман қалған адамдардың жиын­тық бейнесі. Талай рет өліммен бет­пе-бет келсе де, өзінің ең жа­қын жаны – анасымен қайта қауы­ша­тынына сенімін жоғалт­пайды. Фильм өмірлік құндылық­тарды ой елегі­нен қайта өткізуге, адамға, қо­ғам­ға деген көз­қарас­ты өзгер­туге өз әсерін тигізбей қоймайды. Тарихи тақырыптарды топ­тас­тырған бірегей туынды Қазақ­стан, Беларусь, Әзербайжан республикаларында түсі­рілген. Фильмнің ең басты жетістігі – актерлердің өз рөлін шынайы бейнелей алғаны. Ананың образындағы Алты­­най Нөгербектің, Ілияс­тің рөлін­дегі Әділ Ахметовтің, Ералы бейне­сін­­дегі Болат Әбділ­мановтың, Хамит­ті кейіп­теген Азамат Саты­бал­­дының, Мұқан­ды ой­нағ­ан Еркебұлан Дайыровтың, Лұқ­пан­ды кескіндеген Берік Айтжановтың ойы­нын­дағы шындық сендір­мей қоймайды. Жалпы алғанда, фильмнің түсірі­ліміне 2000-нан астам адам жұ­мыл­дырылған. Тұсаукесер салтанатына фильм­­нің бас продюсері Әлия Назарбаева, Мәдениет және спорт вице-ми­нистрі Ғалым Ахме­дияров, Алматы қаласы әкімінің орын­басары Арман Қырықбаев, Мәжі­ліс депутаттары Зағипа Балиева мен Бірғаным Әйтімова қатысты. Фильмнен шыққан соң ұлттық танымы мен жүрегіне қозғау салған қуаттан айыға алмаған барлық аналарды Сарай сыртында қуаныш гүлі күтіп тұрды. Айгүл АХАНБАЙҚЫЗЫ, «Егемен Қазақстан» АЛМАТЫ