Сэм Уолкер – «Kazakhstan open» чемпионы

Алматыдағы «Жайлау» гольф клубында 29 қыркүйек пен 2 қазан аралығында «Kazakhstan Open - 2016» халықаралық турнирі өтіп, оған әлемнің 25 елінен 132 ойыншы қатысты. Халықаралық жарыс дәстүр бойынша Pro-Am турнирінен басталды. Бұл үлкен ойын алдын­дағы соңғы тиянақты дайын­дық сияқты шара екен. Ол, сондай-ақ, қатысушылардың өзара танысып, тіл табысуына себеп болады. Осы кезең үшін де қомақты жүлде тігілді. Биыл­ғы жеңім­паз­дарға Мальдив жаға­жайы­на жолдама берілді. Әлемдік деңгейдегі гольф ал­пауыт­тарының үздігін анық­тай­тын турнир – Лондонда өтетін Еуропа туры ойындары. Ойыншылар оған жету үшін бірнеше деңгейден тұра­тын халықаралық жарыстар ұйым­дастырылады. Соның бірі – «Kazakhstan Open». Осымен он екінші жыл өткен сайысты «European Challenge Tour» ұйымы, Қазақстанның гольф федерациясы және «Жайлау» гольф клубы ұйымдастырды. Алматы қаласы­ның әкімдігінің қолдауымен сәтті аяқталған ойындардың тұрақ­ты бас демеушісі «Eurasian Resource Group» компаниясы бол­ды. Шетелдік және отандық бұқара­лық ақпарат құралдарында кеңінен насихатталған турнирдің негізгі ақпараттық серіктесі болу «Егемен Қазақстан» газеті үшін де дәстүрге айналды. Сонымен, он екінші турнир несімен есте қалды? Осы сұрақты ұйымдастырушыларға да, шетелдік ойыншыларға да қойып көрдік. Діттеген жауап біреу: «Жоғары деңгейде ұйымдастырылған мінсіз әрі қомақты қаржы тігілген ойын». Әсіресе, «Kazakhstan Open-2016» халықаралық турнирінің бюджеті шетелдіктер үшін елең етерлік. Әуел баста француз ойыншысы Роман Лангаске айтып еді: «Бас жүлдеге тігілген 72 000 еуро мені Қазақ­станға жетеледі», деп. Қо­нақ­­тардың айтуынша, мұндай қомақты қаржыны бәске тігетін елдер санаулы. Дәл осы 72 000 еуро тұра­тын бас бәйге ағылшын ойыншысы Сэм Уолкердің қан­жығасын майлады. Жасыл қырат үстінде 270 рет сәтті соққы жасап, 18 ұпай жинаған кәсіпқой гольфші қарсыластарына қарасын көрсетпеді. Бұл – Сэм мырзаның аз уақыт аралығындағы екінші үлкен жеңісі. Ол тамыз айында Финляндияда өткен «Vierumäki Finnish Challenge» турнирінде де жеңімпаз болған. Жарыстың екінші жүлдесі Уолкердің жерлесі, ағылшын Джордан Смитке бұйырды. Ал үшінші орынға нидерландтық Райнер Сакстон көтерілді. – Ойынның соңғы күні қиын жағдайда өтті. Жаңбыр мен қар араласып жауып, ел-сел етті. Дегенмен, діттеген нәти­жеге жеттім-ау... Осындай ойын ұйым­­­дастырып, қатысуға мүм­кін­­дік берген сіздерге рахмет. «Бәйтерек» кубогын қолыма ұстау бақыты бұйырғанына бек қуа­ныш­тымын. Қазақстан жасасын! – дейді «Kazakhstan Open-2016» халықаралық турнирінің чемпионы Сэм Уолкер. Қалмаханбет МҰҚАМЕТҚАЛИ, «Егемен Қазақстан»  АЛМАТЫ