фото: Ақмола облысы Полиция департаменті
Ақмола облысының денсаулық сақтау басқармасы хабарлағандай, оқыс оқиғадан соң ол ауруханаға ауыр жағдайда жеткізілген.
«23 ақпан күні таңертең қыз өмірден озды. Ол көптеген аса ауыр жарақат алды: бас сүйектің кең көлемді сынуы, бас сүйектің негізі және бет қаңқасының зақымдануы, сондай-ақ ауыр ашық бас-ми жарақаты, ауыр дәрежедегі травматикалық шок. Медициналық болжам бастапқыда өте қолайсыз болды, себебі алынған жарақаттар өмірге үйлеспейтін еді», деп хабарлады денсаулық сақтау басқармасы.
Оқиғадан кейін өңірлік полиция Бурабай курорттық аймақтарында шаналар мен квадроциклдерді тексеруге кірісті. Бұл көліктердің иелеріне техника қолдану ережелерін қатаң сақтау, қорғау құралдарын пайдалану және қауіпсіздік талаптарын бұзумен жолаушыларды тасымалдамау керектігі ескертілді.
Айта кетейік, 14 ақпанда Бурабай кентінде қарда жүретін көлік қатысқан апат болды. Салдарынан жолаушы жарақат алып, медициналық мекемеге жеткізілді. Жүргізуші де дене жарақатын алған.
