Қала қазаны ортаймайды

Алматыдан – Мира БАЙБЕК

Алматының еліміздегі ауыл­шаруашылық өнімдерін өткізу­дің негізгі нарығы болып отыр­ғаны шындық. Осы мүмкіндікті пайдалана отырып, тұрғындар­ды экологиялық таза өнімдер­­­мен қам­­тамасыз ету мақсатында ауыл­­­­­­­­­шаруашылық өнімдері жәр­меңкелерін жиі өткізіп отыруды қала әкімшілігінің дәстүрге айнал­дырғанына біраз болды. Қазан айының алғашқы кү­нінде Оңтүстік Қазақстан об­лы­сының ауылшаруашылық өнім­дері жәрмеңкесі өтті. Та­биғи таза өнімдерді сатып алу үшін қала тұрғындары дем­а­лыс күні «Астана» алаңына ағыл­­­­ды. Жәрмеңкеге қатысқан Оң­түстік Қазақстан облысының 3 қаласымен (Шымкент, Түркістан, Арыс) және 11 ауданымен бірге, Алматы қаласының 40 сауда, та­мақ кәсіпорны да жұртшылыққа өз өнімдерін ұсынды. Жәрмеңкеге жеткізілген 50-ден астам тауар түрлері, оның ішінде, ет-сүт, же­міс-жидек, балық сияқты өнім­дердің бағалары қала базарларынан 15-20%-ға төмен болды. Сондай-ақ, Алматыға Шығыс Қазақстан облысынан 50 тонна бал алып жеткен омарташылар­дың да Бал жәрмеңкесі өтті. Сапалы балдың 25 түрі жеткізілген бұл жәрмеңкеде омарташылар сатып алушыларға балдың дәмін та­тып, ара өнімдерін дұрыс таң­дауға мүмкіндік берді. Ал қала әкім­­дігі өз тарапынан өнімін сау­да­лаушыларға сауда орындарын тегін беріп, жұмыс істеуге қажетті мүмкіндік жасауға тырысты. Мұндай жәрмеңкелерді өткізу қаладағы сауда қауіпсіздігі мен инфляцияны төмендетуге ықпалын тигізетіні әрі тұрғындардың негізгі азық-түлікті қолжетімді баға­мен алуына мүмкіндік туғызатыны анық.

Шымкенттен – Бақтияр ТАЙЖАН

Биыл Оңтүстікте бидайдан ре­кордтық көрсеткіш алынды. Әр гектардан 22 центнерден айналып, егіс көлемі өткен жылдан 13 мың гектарға артты. Азық-түлік қауіпсіздігін ны­ғайту үшін ауыл шаруашылығы саласы табысты жұмыс жасау керек. Бұл бағытта 29 млрд теңге бөлініп отыр. Осындай мемлекеттік қол­даулардың нәтижесінде бірінші жартыжылдықтың қорытындысы бойынша ауыл шаруашылығы­ның жалпы өнім көлемі 123 млрд теңгеге жетті. Ағымдағы жылы дәндік жү­геріден 108,4 мың тонна, көк­өністен 811 мың тонна, бақшадан 1 252 мың тонна, картоптан 195 мың тонна, масақты дақылдардан 470 мың тонна өнім жиналды. Жыл басынан фермерлерге «Ырыс» қаржыландыру ұйымы ар­қылы төменгі пайызбен 486 жобаны қаржыландыруға 1,2 млрд теңге көлемінде несие берілді. Облыс әкімі Бейбіт Атам­құ­ловтың бастамасымен Шым­кентте азық-түлік белдеуі құрылып жатыр. Өйткені, қала халқы бір мил­лионға жетті. Бұл бір жағынан аудан, қалалардағы шаруалар мен диқандардың дайындаған мал еті және дақылдарын өткізуге сеп­теседі. Сонымен қатар, ауыл­ша­руашылық өнімдерін қай­та өңдеуге үлкен мән беріліп отыр. Сонда сырттан тасымалда­нып келген тауарлар ағынын шек­теу­ге болады.

Ақтөбеден – Сатыбалды СӘУІРБАЙ

Ақтөбеде жаз бойы ұйым­дастырылған аудандардың күн­дері аясында жәрмеңкелер өт­кізіліп, қалалықтар арзан  азық-түлікпен қамтамасыз етілді. Қала тұрғындарын жеткілікті кө­лемде көкөніс өнімдерімен қам­­тамасыз ету мақсатында 2015 жылы «Ника-99» ЖШС және «Агрофирма Көктем» ЖШС жы­лы­­жай құрылысы және кеңейту бойынша жобалар іске асырылды.  Сондай-ақ, макарон өнімдерін өндіру бойынша қуаты 11 мың тон­наны құрайтын «Жаңа-Әлжан диірмен комбинаты» ЖШС-нің өндірісі іске қосылды. Қазірдің өзінде «Айбек» ӘКК» ЖШС қуаты 5,0 мың тоннаны құрайтын ет консервілеу цехын пайдалануға берді. Сондай-ақ, «Айс» ЖШС қуат­тылығын тәулігіне 50 тоннаға дейін жаңартты,  «Толерис» ЖШС тәулігіне 3 тонна сүт өндіру цехын іске қосты. Үстіміздегі жылдың тамыз айын­да «Базарлар басқармасы» ЖШС мен «Пригородный» ауыл шаруашылығы фирмасы» ЖШС арасында тұрақтандыру қорына килосын 50 теңгеден 1000 тонна картоп, 45 теңгеден 136 тонна сәбіз, 30 теңгеден 68 тонна қы­рық­қабат, 55 теңгеден 10 тонна қызылша сатып алуға келісім шарт жасасты. Жалпы сомасы 58710000 теңге құрайды. Қазір осыншама көлемдегі көкөністі қоймаларға салу басталды, бұл жұмыс үстіміздегі жылғы 10 қа­­ра­­шада аяқталады. Сондай-ақ, тұрақтандыру қорын құру комиссия­сында  сатып алынатын картоп көлемін 300 тоннаға арттыру мәселесі  қаралды, «Ақтөбе Фудс» ЖШС-нен  лит­рін 300 тең­геден 100 тонна күнбағыс майын сатып алуға ше­шім қабылданды. 200 тонна пиязды еліміздің оң­түстік аймақтарынан сатып алу көз­делуде. Қостанай облысынан ұн сатып алу қарастырылуда. Қалада 35 осы заманға сау­да нысандары жұмыс істейді. Жер­гілікті тауар өндірушілердің өнімдері ірі сауда желілері арқы­­лы да ұсынылады. «Анвар», «Дина» ірі желілік дүкендерімен, азық-түлік базарларымен сауда үстемесін 10 пайыздан арттырмауға ме­мо­рандумға қол қойылды. Жам­­был, Оңтүстік Қазақстан, Қызылорда және Қостанай облыстарымен өңіраралық коопе­рация аясында негізгі азық-түлікті толықтыруға  форвардтық келісімшарт жа­салған. Өңірде 33 әлеуметтік азық-түліктің бағасы тұрақты қолжетімді деңгейде ұсталуда.

Өскеменнен – Думан АНАШ

Халықты азық-түлікпен қамта­масыз етумен бірге тауарды төмен бағамен сату да өзекті. Бұл тарапта Өскемен қаласы әкімдігі арнайы жұмыстар жүргізуде. Бүгінде сауда нысандарының жетекшілері­мен келісу барысында 24 әлеуметтік бөлім ұйымдастырылып отыр. Мұнда әлеуметтік маңызы бар тағам өнімдерінің үстемесі 10 пайыздан аспайды. Бұл бөлімдер қаланың ірі сауда орталықтары санатындағы «КП «Торг» ЖШС («Колос», «Самал», «Волна», «45-ші гастроном»), «Риддер» ЖШС,  «Техмаркет» дүкендері, «Жәр­дем», «Дина», «Заречный», «Достық» базарларында орналасқан. Қала тұрғындарына қол­жетім­ді бағалармен өнімдерді сату бо­йынша  тауар өндірушілермен, кәсіпкерлермен, базарлармен, толайым сатушылармен және дүкендермен меморандумдар жасалуда.  Нан бағасын тұрақтандыру мақсатында Өскемен қаласы әкімдігі глубокоелік «Шахан Ата» ПКФ» ЖШС  наубайханасымен ке­лісім жасады. Ағымдағы жылдың қыркүйек айында «Жәрдем» базары аумағында қала әкімдігінің қолдауымен «Боков» фирма­лық сауда нүктесі ашылды. Онда макарон өнімдерінің алуан түрі, ұнның әр түрлі сұрыптары, қант, шай, жарма түрлері нарықтан төмен бағалармен халыққа ұсынылуда. «Фреш маркет» сауда орта­лығы, «Металлургтердің мәде­ниет сарайы» аумақтарында тұр­­­ғындарды 10-15 пайыздық тө­мен бағалармен қамтамасыз ету мақсатында апта сайын сенбілік жәрмеңке ұйымдастырылуда.