Ақынның жұлдызы «жанды»

Біз бұған дейін де Алматыда бірнеше Жұлдыздар аллея­сы бар екендігін жазғанбыз. Оның алғашқысы «Қазақфильм» ұлт­тық киностудиясында болса, одан кейін «Алматы» шипажайында да ашылған. Ендігі бір жұлдыздар аллеясы алматылықтар көптеп жиналатын MEGAPark сауда ойын-сауық орталығының кіреберісінде орналасқан. Енді осы Жұлдыздар аллеясында ақын Олжас Сүлей­меновтің атаулы жұлдызы бар. Дүйсенбі күні дүкенге жинал­ған көпшілік көзі тірі ақын­дарының ішінде атақтысы, жазу­шы-әдебиеттанушы, қоғам қайрат­кері Олжас Сүлейменовпен дидарласып, қолтаңба алып, ерекше сәттерді бас­тан өткерді. Осынау қуанышты оқиғаға еліміздің ғылым, мәдениет, өнер саласындағы көрнекті қай­рат­керлері Асанәлі Әшімов, Мұрат Әуезов, Тимур Сүлейменов, Ефим Зуслин, Майдан Әбішев, Сафар Абдулло сынды танымал адамдар ортақтасты. «Жұлдыздар аллеясы нарық­тық экономика жағдайында үлкен дүкеннің қасында орналасқаны дұрыс, бұл қуантады. Өйткені, мәдениет те нарықтық экономи­каның заңдарына бағынады. Жыл­дарға созылатын үлкен жоба­ларым бар. Сіздердің осы құр­мет-қошеметтеріңіз маған шығар­машылық қуат береді. Ең бас­тысы, ынтымақ пен тыныштық болсын. Елiмiз аман болсын! Әлемнің түкпір-түкпірін аралаймын. Мазасыз күн кешіп жатқан елдерде, шиеленісті аймақтарда да болдым. Мұндай жерлерге барғаннан кейін менің жазуға деген құлшынысымның қуаты арта түседі. Барлықтарыңызға алғысымды білдіре отырып, бұдан кейін де сіздердің құр­мет­теріңіздің үдесінен шыға­мын деп үміттенемін», – деді Олжас Сүлейменов. Аллеядағы атаулы жұлдыздың ашылуында еліміздің танымал тұлғалары сөз алып, салтанатты оқиғаның салмағын арттырды. «Бұл Жұлдыздар аллеясы ұзақ жасайды деген үміттемін. Өйткені, ол Олжас Сүлейменов сияқ­ты адамдарға арналған. Бұлар – ғасырлар бойы дамып келе жатқан мәдениетке қызмет ететін адамгершіліктің жоғары дәре­жесіне ие тұлғалар санатында. Мұның барлығы Қазақстанда ғана емес, бүкіл Жер шарында тыныш­тық болуы үшін жасалып отырған игі іс», – деді Мұрат Әуезов. Astana Group президентінің мәдениет жөніндегі кеңесшісі Айдын Сұлтановтың айтуынша, Жұлдыздар аллеясында Олжас Сүлейменовтің де Жұлдызын «жағайық» деген ұсынысты актер Асанәлі Әшімов бастаған. Олжас Сүлейменовтің жұл­дызы мәрмәрдан, мыс пен жезден жасалынған. Өлшемі – 60х60 см. Алдымен Жұлдыздар аллеясында екі дүркін Олимпиада чемпио­ны, «ДОМ» қорының басшысы Аружан Саинның жұлдызы жанды. Аружан Жұлдызын қайырым­дылықпен айналысатын қазақ­стан­дық азаматтарға арнады. Кейі­нірек Жұлдыздар аллеясын Олим­пиада чемпионы, Қазақстан велоспорт федерациясының вице-пре­зиденті Александр Вино­куровтың Жұлдызы, биылғы қыр­күйек айында актер, кино және театр режиссері, сценарий қоюшы, ұстаз Асанәлі Әшімовтің Жұлдызы «жанды». Айнаш ЕСАЛИ, «Егемен Қазақстан» АЛМАТЫ