Қошемет құшағында

әкелі-балалы композиторлар Айтқали және Арман Жайымовтар Конгресс-Холл сарайында өткен Айтқали Жайымов пен оның ұлы Арман Жайымның шығармашылық кешінде көрермендерді дарынды өнер иелерінің күрделі музыкалық туындылары тәнті етті. Концерттің шымылдығы түрілген кезде Қазақ халық аспаптары оркестрі­нің көркемдік жетекшісі әрі бас дирижері, Қазақстан Республикасының еңбек сіңірген қай­раткері, профессор Айтқали Жайымов қазақтың қоңыр домбы­расын қолына алып, сахнаға шық­ты. Ол өзінің ел Тәуелсіздігіне арна­ған «Еркін ел», «Өмір-өзен» және Дина Нұрпейісоваға арнаған «Күй-Ана» күйлерін орын­даған­да, көрер­мен­дер ұзақ қол соғып, қошемет білдірді. Осы кеште елорда тұрғындары мен қонақтары классикалық шығарма­ларды сүйсіне тыңдады. Терең сезімге бой­лайтын, бірнеше бөлімнен тұратын шығармаларды тыңдаған жұртшылық хас өнерді жоғары бағалап, шынайы құрмет көрсетті. Айталық, Ғазиза Жұбанова атындағы мемлекеттік ішекті аспаптар квартеті Арман Жайымның квартетке арналған төрт бөлімді №1 концертін орындады. Сондай-ақ, көрермен назарына қос композитор бірлесіп жазған «Бейбарыс» операсынан үзінді ұсынылды. Осы орайда, Қазақстанның еңбек сіңірген қайраткері Азамат Жылтыркөзовтің орындауындағы Бейбарыстың ариясы сәтті шықты. Ал Қазақстанның еңбек сіңірген қайраткері Бибігүл Жанұзақ Айдананың ариясын нақышына келтіре шырқады. Халықаралық конкурстардың лау­реаты Шахризада Тыныштық «Төле би» кан­татасынан «Қарлығаштың әнін» орын­дап берді. Қобызшы Ботагөз Тәшімова оркестрдің сүйемелдеуімен Арман Жайымның қобызға арналған кон­цертін ұсынды. Сонымен қатар, кей­бір шығармаларды әрлеп, «Шалқыма» халық би ансамблі де өнер көрсетті. «Бұл біздің ел Тәуелсіздігінің 25 жыл­дығына арнаған концертіміз. Сондықтан да «Шаттық Елі» деп аталды. Концертке келіп, Қазақ халық аспаптары оркестріне және өзге де өнер көрсеткен азаматтарға қошемет білдірген көрермендерге үлкен ризашылығымызды білдіреміз», – деді Айтқали Жайымов. Концерт барысында Астана қаласы әкімдігінің мемлекеттік академиялық филармониясының Қазақ халық ас­пап­тары оркестрі қалыптасқан өнер ұжы­мы екенін айқын байқатты. Небір күрделі күйлерді, басқа да музыка­лық туындыларды асқан шеберлікпен жеткізе білді. «Егемен-ақпарат»