Ғарыш пен ғылым ұштасты

Елордада тұңғыш қазақ ғарыш­кері Тоқтар Әубәкіровтің ғарышқа ұшуы­ның 25 жылдығына арналған «Ғарышқа ғылым арқылы» тақыры­бымен халықаралық ғылыми-тәжіри­белік конференция өтті. Шараға алыс-жақын шет мемлекеттердің ғалым­дары мен отандық ғарыш сала­­сының үздік мамандары және университет сту­денттері қатысып, адамзаттың аспан әлемін танып-білу мен ғарышты игеруге қатысты соны жаңалықтарды сөз етті. Халық қаһарманы, КСРО-ның ұшқыш-сынақшысы, техника ғылы­м­дары­ның докторы, «Тұран-Астана» уни­­вер­ситетінің профессоры Тоқтар Оңғарбайұлының ғарышқа алғаш ұшуы мен Тәуелсіздігіміздің 25 жылдық мерей­тойының тұспа-тұс келуі айрықша атап өтерлік жайт. Соған сәйкес, жас­тар­­дың ғылымға бет бұруында баспа­л­дақ сана­латын университет шаңыра­ғында ұлт батырымен арнайы кездесу өткізудің астарында терең мән жатыр. «Бұл жерде біздің көздегеніміз, бүгінгі жастарымызға өз ғарышкер­лері­мізді үлгі, өнеге ете отырып, ғылым­ды насихаттау. Осылайша, олар­дың зерттеулері мен инте­ллек­туалдық әлеует­терін кейінгі толқын іні-қарын­дас­тары­мызға оқытып, үйретсек деген ниетпен жүзеге асырылып жатқан шара», – дейді аталмыш оқу орнының ғылы­ми жұмыстар жөніндегі проректоры Темірхан Толқынбаев. Халықаралық деңгейде ұйым­дас­­тырылып отырған конференция бол­ғандықтан, мұнда бас-аяғы 122 баяндама тақырыптық сессияларға бөлініп, тыңдалды. Отырысқа жетек­шілік еткен «Тұран-Астана» универ­ситеті­нің ректоры, профессор Гүлжамал Жапарова: «Қос мерекенің қатар келуіне орай, жастарымыз үшін біз осындай танымдық тұрғыда берері мол кездесу ұйымдастыруды жөн көрдік. Бүгінгі жиынға ұлтымыздың қос мақтанышы – Тоқтар Оңғарбайұлы мен үшінші ғарышкеріміз Айдын Айымбетов ғана келген жоқ, Ресейді айтпағанның өзінде, Ұлыбритания мен Түркия, Болгария, Қытай, Украина сынды мемлекеттердің де ғарыш саласына еңбегі сіңген үздік ғалым, мамандары шақырылып, арнайы дәріс оқуда. Біз үшін бұл – зор жетістік. Жастарымыздың ғылымға бет бұрып, отандық ғарыш саласының, жалпы ғылымның дамуына үлес қосуы осындай конференциялардан бастау алса керек», – деді. «Қазақстан ғарыш сапары» ҚК» АҚ пен еліміздегі бірқатар жоғары оқу орындарының және Ресей, Украина, Болгария, Түркия, Қытай уни­вер­ситет­терінің атсалысуымен өткен жиын­ға ғарыш саласы бойынша  таны­мал отандық және шетелдік ғалымдар, Қазақ­стан мен Ресей ЖОО ректорлары да қатыс­ты. Сондай-ақ, азаматтық авиация өкілдері мен Мәжіліс депутаттары және қоғам қайраткерлері үн қосып, пікір ал­масқан алқалы жиында Тоқтар Оңғар­байұлының құрметіне мерекелік концерт ұйымдастырылып, арнайы сый-сияпат жасалды. Нұрлыбек ДОСЫБАЙ, «Егемен Қазақстан»