Заманауи зергерлік

Ұлттық музейдің  «Астана» ұлттық сурет галереясында ел Тәуелсіздігінің 25 жыл­дығына арналған «Ұлы Дала мұрасы» атты сәндік-қолданбалы өнер туын­дыларының көрмесі ашылды. Қолөнер – атадан балаға даритын кәсіп. Соның айғағындай, ел ішінде он саусағынан өнері тамған, қолөнердің сан саласын меңгерген ісмерлер аз емес. Оған қоса, бұл күнде жоғары оқу орындарында қолөнердің түр-түрі бойынша арнайы мамандар даярланып шығады. Галереяға қойылған өнер туындылары ішінде жеке адамдардың да, жоғары оқу орындары оқытушылары мен студенттердің де үздік жұмыстары болды. Бұл орайда Қазақ ұлттық өнер университеті мен Қазақ технология және бизнес университеті оқытушылары, Қытайдан келген қандастарымыз керемет әшекейленген, әсем бояулы, ағаш, тері, сүйектен жасалған бұйымдарын қой­ды. Сондай-ақ, тоқыма, киізден жасалған туындылар қойылды. Бұл бұйымдардың бірқатары зергерлік өнердің биік дәрежесіне жетіп, халықаралық көрме, фестивальдерге қатысушы шеберлердің қолынан шыққан екен. Көрме жайында пікірін білдірген «Астана» ұлттық сурет галереясының бөлім басшысы, көрмені ұйымдастырушы Ғалия Бәкірланова көрменің жас ұрпаққа керемет патриоттық, эстетикалық тәрбие беретінін, рухани азығын сыйлайтынын айтты. – Біз осындай тамаша туындыларды көр­генде өзіміздің бай мәдениетіміз үшін, халық ішінде керемет талантты адамдардың бар болғаны үшін мақтаныш сезімде боламыз. Өйт­кені, бұл кез келген адамның қолынан келе бермейді. Асқан шыдамдылықты, ұқып­тылықты, ең бас­тысы – талантты қажет ететін өнер бұл. Әсіресе, көрмеге келіп жатқан жас­­тар еліміз­дің мәдениеті мен өнерінен жан азы­­ғын алатыны қуантады. Екіншіден, ер­тең­г­і күні ЭКСПО-ға алдымен осындай қол­­өнер бұйымдарын шығарамыз ғой. Сонда «Қазақ­станда жасалған» деген белгі үшін де мар­қаятын боламыз, – дейді Ғалия Бәкірланова. Көрме соңы қолөнердің әр түрінен, атап айтқанда, киіз бұйымдарын жасау­дан, тері өңдеуден, біз кесте мен ине кестені қолданып, ою-өрнектер салудан, ағаш өңдеу мен қыш өңдеуден шебер­лік сыныптары өткізілді. Шеберлік-сы­нып­тарын өз салалары бойынша 17 шебер жүргізді. Айгүл СЕЙІЛОВА, «Егемен Қазақстан» Суретті түсірген Орынбай БАЛМҰРАТ, «Егемен Қазақстан»