Әзірлік барысында әкім шахтаға түседі

Алдағы жылы елімізде өтетін ЭКСПО-2017 халықаралық көрмесіне әзірлік шаралары Қарағанды облысында қарқынды жүргізілуде. Осы көрме аясында шетелден келетін қонақтарға арналған қызықты туристік бағыттардың бірі – көмірлі Қарағандының шахталарын аралау, дәлірек айтқанда, кәнігі кеншілер сияқты жер астына түсу болмақ. Шахта түгіл, ғарыш сапарына тәуекел етіп, тіпті сол үшін миллиондаған доллар қаражат төлеуге дайын тұратын кей жандар үшін бұл бір тартымды саяхат болуы тиіс. Қонақтар үшін қауіпсіздік шаралары қаншалықты дәрежеде екенін бағамдау мақсатында облыс басшысы Нұрмұхамбет Әбдібеков тиісті шахталарға алдымен өзі түсіп, көз жеткізуді жоспарлап отыр. Кәсіпкерлік пен білім басқармалары басшыларының мәлімдеуінше, шетел­дік қонақтар үшін осындай саяхат ұйым­дастырудың екі жолы бар. Оның бірі жұмыс істеп тұрған шахталардың бірінде қарастырылып жатса, екінші жоба колледж шәкірттерін тәжірибеден өткізуге арналған қауіпсіз тәжірибелік лавада жүзеге асырылуы мүмкін. – Қалай дегенмен, кеншілер мен бұл саладан хабары бар болашақ маман­дар өз алдына, қарапайым адамдар, яғни ту­рис­тер үшін кен өндіру орнында еш қауіптің болмайтынына әбден көз жет­кі­зуіміз керек, – дейді өңір басшысы. Ал әзірге ЭКСПО-2017 көрмесінің Қа­ра­ғанды облысы бойын­ша алты ту­рис­тік бағыты ресми түрде бекітіл­ген. Оларға жауапты «Noma­dicTravel­Kazahstan», Қарқаралы мемлекеттік ұлттық табиғи паркі және «Павлин-Тур» туристік операторлары «Астана ЭКСПО-2017» ұлттық компаниясымен әріптестік жөніндегі меморандумға қол қойысқан. Бұл туралы облыстың кәсіпкерлік бас­қармасының басшысы Татьяна Аблаева мәлімдеді. Осы бағыттар Инвестициялар және даму министрі мен Мәдениет және спорт министрінің ортақ бұйрығымен бекітілген ЭКСПО-2017 халықаралық көрмесінің қонақтарына арналған туристік бағыттар тізіміне енгізілген. Бұған қоса, шетелдік қонақтар үшін «Шебер» қолөнер орталығы да есі­гін айқара ашпақ. Мұнда келушілер қа­зақ­тың ұлттық қолөнерімен, оның бүгінгі туын­дыларымен танысып қана қоймай, естелікке тері мен киізден жасалған заттарды, зергерлік бұйымдарды, тағы да басқа ыңғайлы дүниелерді ала алады. Шетелдік қонақтарды қабылдауға қазірдің өзінде жалпы саны 13 мың орындық 220 қонақ үй әзір. Олар туралы ақпараттар онлайн-броньдаудың www.booking.com сияқты әлемдік жүйе­леріне орналастырылған. Көрмеге би­леттерді де онлайн жүйе арқылы алу­ға болады. Мезгілі таяғанда қала­ның ха­лық көбірек шоғырланған орын­дарын­да арнайы кассалар ашылады. Тур­опе­раторлар өз қонақтары үшін 8 мың би­летті алып та қойды. Әр билеттің құны 4-7 мың теңге аралығында болмақ. «ҚазАвтоЖол» ұлттық компаниясы» АҚ Қарағанды филиалының директоры Қанат Шайминнің мәлімдеуінше, Ас­тана–Теміртау автодаңғылы 1 жел­­тоқ­санға дейін толық дайын болады. Жол жөндеушілер, сонымен қатар, Қар­­қаралы ұлттық паркі мен Ұлытау та­биғат қорығына апаратын жолдарды да тақтайдай етуді, жол бойынан қосымша павильондар мен демалыс орындарын іске қосуды жоспарлап отыр. Қарағандылық өндірушілер ЭКС­ПО-2017 нысандарын салушыларға, сон­дай-ақ темір-бетон бұйымдарын, жылу ра­диаторларын, құбырлар, құрылыс қоспаларын, бояу-сырлау өнімдерін, өрт сөндіру жүйелері мен құралдарын жет­кізіп беріп отыр. Облыстық басқарма Ас­танадағы құрылыстардың барысына тұ­рақты мониторинг жасап отырады. Жыл соңына таман негізгі нысандар іске қо­­сылады. Яғни, сол кезде оларға басқа да өнімдер қажет болады. Мата, жиһаз, бас­­қа да керек-жарақтарды өндірумен ай­на­­лы­сатын ұйымдар сол кезде жаңа ке­лі­сім­шарттар жасасуға дайын болуы керек. ЭКСПО-2017 көрмесі ауылшаруа­шы­лық өнімдерін өндірушілерге де тиімді болмақ. Олар Астананың күрт өсе­тін сұранысының арқасында өздері шыға­ра­тын өнім көлемін едәуір арттыра алады. Облыс әкімі жоғарыдағы жиында айтқан­дай, бұл орайда мейлінше ширақ қимылдау керек. Бұрыннан бар жеткізу тәсілдерінен бөлек, шаруа қожалықтары өз өнімдерін тікелей алып бара алатын нысандарды көздеу қажет. Қайрат ӘБІЛДИНОВ, «Егемен Қазақстан» ҚАРАҒАНДЫ