Бірігіп қолға алған тірлік

Қазіргі таңда облыстың ауыл шаруа­шылығы саласының өркендеуіне шаруа­шы­лықтардың ұсақтығы кері әсерін тигізуде. Жамбыл облысында 100 гектарға дейінгі жер телімі бар шаруашылықтардың үлесі 70 пайызды құрайды. Әрине, өңірде шаруа­шылықтарды біріктіру, ірілендіру жұмысы назардан тыс қалған емес. Майда болған соң бұл шаруашылықтардың шаруасы да, машақаты де шаш-етектен. Не несие ала алмайды, не мемлекет тарапынан берілетін жеңілдіктерді пайдалана алмайды. Жақында Жамбыл облысында сүт клас­терін дамыту, сондай-ақ кооперативтерге шағын шаруашылықтарды біріктіру мақ­сатында жаңазеландиялық «Fonterra» және Даниялық «Arla» бағдарламалары бойынша Меркі ауданын­да құрамына 42 шаруашылық біріккен «Меркі өнімдері» өндірістік коо­пе­ративі құрылды. Облыстық ауыл шаруашылығы бас­қар­­­масы басшысының орынбасары Ерке­бұлан Ана­бековтің айтуына қарағанда, алдағы уақытта бұл өндірістік кооператив төңірегінде 70-200 басқа дейін асыл тұқымды сауын сиы­ры бар тауарлы-сүт фермалары құрылатын болады. Кооператив олардың төңірегіндегі сүт өндірушілерді, мал азығын дайындаушыларды ұйымдастыра отырып, дайын өнімді өткеру жұмыстарымен айналысады. Бұл мақсатта сүт бағытындағы 1000 бас асыл тұқымды ірі қара малын сатып алуды қаржыландыратын шағын несие мекемесі де жұмысын бастады. Оралхан ДӘУІТ, «Егемен Қазақстан» Жамбыл облысы