Ынтымақтастық үлгісі

Өткен жылғы Президент жанындағы Шетел инвесторлары кеңесінің XXVIII пленарлық отырысында Мемлекет басшысы Нұрсұлтан Назарбаевтың «Қазақстан шетелдік инвестициялар арқылы қажетті білімге, технологияларға және тәжірибеге ие болады», деп мәлімдегені есімізде. Елбасы инвесторларсыз еліміздің сапалы әртараптандырылған экономикалық өсімін қамтамасыз ету мүмкін еместігін де баса айтқан. С.Сейфуллин атындағы Қазақ агротехникалық университетінің ұжымы Президент бастамасын қолдап, алғашқылардың бірі болып іске көшті. Кеше оқу орнының техникалық факультеті базасында Қазақстан-Германия дәл егіншілік орталығы ашылды. «Дәл егіншілік» сөзін түсіндіре кетсек, мамандардың айтуынша, бұл – өсімдіктердің тіршілік ортасындағы немесе алқап ішіндегі түрленгіштігін ескеріп, егіннің түсімін басқару. Яғни, егін алқабының әр шаршы метрін оңтайлы күтіп-баптау. Диқандықтың аталған түрі ауыл шаруашылығын соны технологиямен жабдықтап, шаруа­шылық және табиғат қорларын үнем­деуді, максималды өнім алуды көздейді. Қазақстан-Германия дәл егіншілік орта­лығының салтанатты ашылу рәсі­мінде алдымен университет ректоры, профессор Ақылбек Күрішбаев сөз сөйледі. «Біз Мемлекет басшы­сының тапсырмасын алғашқылардың қата­рында орындағанымызды мақтан тұтамыз. Нұр­сұлтан Назарбаев еліміздің ауыл шаруа­шылығы саласын ілгерілетуді, оны бірегей заманауи техникамен қамтамасыз етіп, өнім көрсеткіштерін арттыруды әркез айтып келеді. Аграрлық білім ордасының базасынан ашылған дәл егіншілік орталығы – сондай игі бастаманың жемісі. Германияның ауыл шаруашылығы саласы әлдеқашан жетіліп, дамуға бет бұрған өзге елдерге үлгі болуға айналғанын мойындауға тиіспіз. Сондықтан да осы істі неміс ғалым­дарымен бірлесе қолға алып, жүзеге асыруда­мыз. Дәл егіншілік жүйесі, оның тех­но­логия­сын дұрыс пайдалану арқылы, бірін­шіден, тыңайтқыштарды үнемдесек, екіншід­ен, тұқымдықты, жанар-жағармайды және ең­бек күшін азайтамыз. Соның есебінен топырақ­тың құнарлылығы артып, өнім еселене­ді», деді А.Күрішбаев. Оқу орны басшы­сы статистикалық мәліметтерге де тоқта­лып, АҚШ фермерлерінің 80 пайызы дәл егін­шілік технологиясын осы және өзге дең­гей­де қолданып, табысқа кенелетіндерін жеткізді. Басқосуда Ауыл шаруашылығы минис­трлігі Өсімдік шаруашылығы өнімдерін өндіру және қайта өңдеу департаментінің директоры Ажар Қажыбекова сөз сөйлеп, осындай жаңашылдықтар өзгеріске, өркендеуге бастайтынын әңгімеледі. «Қазақстан астықты мемлекеттердің қатарында аталады. Сол себепті, ауыл шаруашылығындағы нәтижелі жа­ңалықтарды біз жатсынбауға тиіспіз. Олар­ды тәжірибемізде қолданып, арнайы мамандарын оқу орындарымызда даярлай алсақ, үлкен жетістік болар еді», деді министрлік өкілі. Германия Федеративтік Респуб­ликасының Қазақстандағы елшісі Рольф Мафаель, Осна­брюк қолданбалы ғылымдар университетінің профессор­лары Дитер Трауц пен Хуберт Корте өз сөздерінде қос мемлекеттің ынты­мақ­­тастығы жыл санап артып келе жатқанын әңгімелеп, Қазақстан Прези­денті Нұрсұлтан Назарбаевтың сарабдал саясатын, әлемдік бастамаларын қолдайтындарын айтты. Ал жаңа ашыл­ған дәл егіншілік орталығын қажетті техникамен тегін жабдықтаған герма­ниялық «CLAAS» фирмасының Шығыс Еуропа бо­йынша аймақтық директоры Нильс Ройтч Қазақ агротехникалық университетінің бұл бастамасын қуана қолдайтындарын жеткізді. «Біздің әріптестігіміз үлкен істерге бастасын деп тілеймін. Қазақстанның кең-байтақ жеріндегі астық өнімділігі дәл егіншілік технологиясын тиімді пайдаланғанда, тіпті арта түсетініне сенімім зор. Қазақ-неміс елдерінің ғылым саласындағы тығыз қарым-қатынасы әлі көптеген белестерге шығады», деген Нильс Ройтч «CLAAS» фирмасының жетістіктерімен, жоспарларымен бөлісті. Шара барысында С.Сейфуллин атындағы Қазақ агротехникалық университетінің бас­шылығы мен Оснабрюк қолданбалы ғылым­дар университетінің өкілдері ғылым-білім және іскерлік байланысты нығай­ту жөніндегі меморандумға қол қойды. Содан кейін қонақтар оқу орны базасын­дағы жаңа орталықты, металл өңдеу және дәнекерлеу, ет өнімдерінің эксперимен­тальді-өндірістік цехтарын, Қазақ-қытай ауыл ша­руашылығын механизациялау, Қазақ­стан-Беларусь инженерлерді дайындау және қайта даярлау орталықтарын, тұқым музейін, Ауыл шаруашылығы биотехно­логиясы ғылыми-зерттеу институтын аралады. Асхат РАЙҚҰЛ, «Егемен Қазақстан»