Теңіздегі тоғысу

Ақтау портына Ресей Федерациясы Каспий флотилиясының кемелері мен экипаж мүшелері достық сапармен келді. Қазақстан Республикасы Тәуелсіздігінің 25 жылдығы қарсаңындағы достық шақыртуды қабыл алған ресейлік теңізшілер Ақтау портына Каспий маңы елдерінің достығын нығайту мақсатында шақырған Иран елінен жетті. Қазақстан мен Ресей флот­­тары арасындағы ынты­мақтастықты тереңдете түсу, өзара тәжірибе алмасу мақса­тындағы кездесу аясында 250 экипаж мүшесі Ақтау қа­ласын аралап, түрлі спорт­тық сайыстарға қатысты және «Мәңгілік алау» кешеніне гүл шоқ­тарын қойды. Ресейлік теңізшілерді Ақтау портына «Татарстан» зымыран кемесі мен «Град Свияжск» шағын зымыран және теңіз кемесі алып келді. Ресей флотилиясында бұл кемелердің алатын өзіндік орны да, өзіндік тарихы да бар. Ресейлік су үстіндегі кемелер бригадасының командирі Сергей Бабсковтың айтуынша, өзге флоттарда мұндай кеме жоқ болғандықтан, «Татар­стан» зымыран кемесі бірегей саналса, «Град Свия­жск» шағын кемесі жақ­сы қаруландырылған. 1989 жы­лы А.Горький атындағы кеме құрас­тыру зауытында жасалып, 1993 жылы суға жіберілген «Татар­стан» кемесі араға он жыл салып Каспий флотилиясы құра­мына енді. Теңіз үстінде 260 шақырым қашықтықта жұмыс жасай алатын «Уран» ракеталық кешені және шабуылға қарсы екі гранатометі бар кеме қазіргі таңда аталмыш флотилиядағы негізгі кемелердің бірі. 2010 жылы А.Горький атындағы кеме құрастыру зауытында жасалған «Град Свияжск» шағын кораблі суға 2013 жылы жіберіліп, бір жылдан соң Каспий флотилиясы құрамына кірген. Заманауи ар­тиллериялық, ракеталық, ша­буылға қарсы, зениттік және радио­техникалық қару­лармен, сондай-ақ, түнгі мез­гілдерде, ауа райының қо­лайсыз кездерінде де алыс қашықтыққа жұмыс жа­сай алатын «Калибр-НК» ракеталық кешенімен жаб­дықталған бұл кеме өткен жылдың қазан айында «Ислам мемлекеті» лаңкестеріне қарсы шабуыл позицияларына қатысқан. Каспий теңізі акваториясынан жасалған соққы снаряд, жарылғыш құрылғылар өндіретін орын мен қару-жарақ қоймасын жаруға атсалысқан. Көрші екі елдің теңіз­шілерінің қарым-қатына­сындағы бұл ал­ғашқы кездесу емес. Әскери оқу-жаттығу немесе достастық кез­десу мақсатында жиі кезде­сетін екі елдің теңізшілері бұдан бұрын 2014 жылы Ақтауда бір­лескен оқу-жаттығу өткізді. Ал қазақ­стандық теңізшілер екі жыл қатарынан Дағыстанның Кас­пий флотилиясына барып, Махач­ка­лада теңіз биатлонынан өткен жа­рысқа қатысып қайтқан болатын. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы Суреттерді түсірген Талант ҚҰСАЙЫН