Жаңаша жабдықталды

Еуразиялық Топтың құрамына кіретін еліміздегі «Қазхром» трансұлттық компаниясы» АҚ филиалы – Ақсу ферроқорытпа зауыты алып кәсіпорындар қатарында. Өндіріс орнында 7 мыңдай адам еңбек етуде. Жылына 1,2 миллион тонна ферроқорытпа өндіретін зауыт елімізде ғана емес, әлемдік металлургия нарығындағы алып кәсіпорындардың бірінен саналады. Жуырда зауыттың №1 балқыту цехында күрделі жөндеуден өткен №15 пеш пайдалануға берілді. Зауыт директоры Сергей Прокопьевтің айтуынша, ескі пешті жөндеу жұмысы шілде айында басталыпты. Бұл алып пеште жоғары көміртекті феррохром балқытылады. Ол жаңғыртылып, жөнделіп, жаңа заманауи жүйе-тетік қондырғылармен жабдықталды. Яғни механикалық, гидравликалық және энергетикалық техникалық қажеттіліктері автоматтандыру жүйесіне ауыстырылды. Алып электр пешінің күрделі жөндеуі зауыттың инвестициялық бағдарламасы аясында жүзеге асты. Пешті жаңа заман талаптарына сай жабдықтауға, жаңартуға салынған инвестиция көлемі 1,4 млрд теңге. Металлургия саласындағы озық құрал-жабдықтар орнатылды. Қауіпсіз, әрі экологиялық жағынан таза. Заманауи технология, жаңа пештің қосылуы зауыттықтар үшін өнімділікке, үнемділікке үлес. Пештің жылдық өнімділігі шамамен 50 мың тонна жоғары көміртекті феррохром. – Негізгі және қосалқы жабдықты үнемі жаңалап тұру – кәсіпорынның табысты дамуының кепілі. Екіншіден, қоршаған ортаны қорғау және еңбекті қорғау саласындағы заманауи талаптар ескеріледі. Күрделі жөндеу кезінде пеш қайтадан жаңаланып, реттеледі. Барлық құрылыс-монтаж жұмыстарын зауыт мамандары жүргізді. Бұл біз үшін мақтаныш. Қазір зауыттығы ең қуатты құрылымы №6 цехты қайта жаңғырту жұмысына дайындық жасалуда. Алдағы желтоқсан айында №64 пеш те күрделі жөндеуге шығарылады, – дейді Сергей Прокопьев. Бұған дейін де зауыттағы №28, №№63, 46, 45 және 12 пештердің күрделі жөндеуден өткендерін жаздық. Бұл – өндіріс орнындағы мақсатты инвестициялық бағдарламалар тиімді орындалуда деген сөз. Қайта жаңарған пештер экологияға зиянсыздығы мен қауіпсіздікке де кепіл­дік береді. Ескі техниканың уақыты кетті. Жаңғырту өнімділікті, сондай-ақ өндірістің сенімділігі мен қауіпсіздігін дамытудың басты факторы. Зауытта өндірісті жаңғырту жұмыс­тары кезең-кезеңмен жүргізілуде. Өнді­рістің озық технологияларын қолдану және жаңғыртудағы мақсат жоғары көміртекті феррохром өндірісін арттыру болып табылады. Фарида БЫҚАЙ, «Егемен Қазақстан» Павлодар облысы, Ақсу қаласы