Бәсі биік бәсекелер қыза түсті

Қазіргі күндері Қызылордадағы «Мұз айдыны» спорт кешенінде гандболдан Азияның тұңғыш клубтық чемпионаты өтіп жатыр. Қазанның 26-сында басталған бұл турнирге Иран, Қатар, Өзбекстан және Қазақстан елдерінен 6 команда қатысуда. Құрлық тарихында алғаш рет қолға алынып отырған бұл жарыс осылайша Сыр бойындағы бас қалада жалау желбіретті. Бұл тектен-тек те емес. Қы­зылорда елімізде Алматыдан кейін әйел­дердің қол добы спорты кең қанат жай­ған қала болып табылады. Кезінде Ал­матының «Отан-Дәулетімен» бәсекеге түсе алатын жалғыз команда – «Сейхун-КАМ» дария жағасындағы шаһардан шықты. Қазір «Қайсар» деген ат алған сол команда осы жарыста өнер көрсетуде. Турнирде еліміздің намысын қазіргі чемпион – Алматы қаласының «Алма­ты», өткен жылдың лидері – Алматы облысының «Іле» және жергілікті «Қай­сар» жасақтары қорғауда. Жарыстың бірінші күні Өзбекстанның «Узбечкасы» Қатар командасын 32:22, «Іле» Иранның «Санандажын» 41:23, «Қайсар» «Алматыны» 23:20 етіп ұтты. Келесі күні «Алматы» «Узбечканы» 31:22, «Іле»  Қатар командасын 35:19, «Қайсар» «Санандажды» 28:24 есебімен тізе бүктірді. Осылайша әзірге «Іле» мен «Қайсар» ұпай жоғалта қойған жоқ. Турнирде кеше бір күндік демалыс жарияланды. Бүгін топ басындағы екі ұжым өзара ұшырасады. Аталмыш бәсекенің беделі де биік болғалы тұр. Ол бір жағы биылғы 19 жел­тоқсанда Қызылордада сөре алатын әлем чемпионатының лицензиялық турнирі де болып табылады. Жарыс 1 қараша күні мәреге жетеді. Лаура ШОҢҒАЛОВА   ҚЫЗЫЛОРДА