СІМ қызметкерлері Нидерландыда тағылымдамадан өтеді

Нидерландыдағы ҚР Елшісі Мағжан Ілиясов «Clingendael» Нидерланды халықаралық қатынастар институтының директоры Рон Тонмен кездесті, деп хабарлайды egemen.kz ҚР СІМ баспасөз қызметіне сілтеме жасап. Кездесуде Қазақстан мен Нидерланды халықаралық қатынастар институты арасындағы ынтымақтастық атап өтілді. Голландиялық тарап 1993 жылдан Қазақстан мен өзге де Орталық Азия елдерінің жас дипломаттарының біліктілігін арттыру бойынша бағдарламаны жүзеге асырып келеді.  Ынтымақтастықтың 23 жылында институтта 100-ге жуық қазақстандық дипломат пен халықаралық қатынастар саласындағы мамандар оқып шықты. Ағымдағы жылдың қараша-желтоқсан айларында ҚР СІМ қызметкерлері институтта біліктілігін арттырады. Рон Тон бірлесіп зерттеу жүргізу,  тағылымдамадан өту мен тәжірибе алмасу аясында қазақстандық ЖОО-мен ынтымақтастық орнатуға қызығушылық танытты.