ОҚО-да мың жыл бұрынғы монша табылды

Оңтүстік Қазақстан облысында осыдан 1 мың жыл бұрын салынған монша табылды. Әлкей Марғұлан атындағы археология институтының мамандары бұл олжаны ХХ ғасырдағы Самани кезеңіне жатқызып отыр. Осыдан 1 000 жыл бұрын салынған бұл монша біздің заманымызға дейін жақсы сақталған. Археологтардың айтуынша, монша 5 бөлмеден тұрады. Қазба жұмыстары кезінде моншаның жылыту жүйесі, екі жуынатын бөлмесі мен бумен қыздырыну бөлмесі табылған, деп хабарлайды облыс әкімдігінің баспасөз қызметінің хабарлауынша. Монша табылған мекен V-VIII ғасыр аралығында Түркі қағанатының қаласы болған. Кейін келе IX-XII ғасыр тұсында бұл жерге самани және қараханиттер тұрақтаған.  Ал шығыс моншасының жылыту жүйелері ежелгі римдік үлгіде жасалыпты. Археолог мамандар «ирандық ұсталардың да қолтаңбалары болуы мүмкін» деп топшылайды. «Мұндай ғимарат, моншалар тек қана қалалардың ішінде салынған. Осындай ғимараттың қасында мешіт болған. Болашақта біз мұны табамыз деп отырмыз. Қазба жұмыстарының қазір 90 пайызы аяқталған.  Архитектуралық ғимараттың табылуы осы қалаға қатысты маңызды деректерді нақтылауға септігін тигізбек. Кейбір жазбаларда бұл маң Маданкент шаһарының орны деп көрсетілген.  Ал елімізде осы сынды моншалар көне Тараз бен Түркістан қалаларының орнынан да табылған», - дейді Ә.Марғұлан атындағы археология институтының бас директоры Бауыржан Байтанаев. Моншаға ертеде бірнеше рет жөндеу жұмыстары жүргізіліпті. Мұны мамандар зерттеу нәтижесінен байқаған.   Келешекте көне құрылыс туристік орынға айналуы да ғажап емес. Ол үшін қажетті инфрақұрылым жасау көзделген.