Астанада әлеуметтік тақырыпта сурет байқауы өтті

Елордада әлеуметтік тақырыптағы сурет байқауына өтініш қабылдау аяқталды. Шығармашылық конкурсқа 18 өтініш түсіп, 25 сурет ұсынылған.  Қатысушылар А3 форматында ұлттық мәдениетті қолдау, отансүйгіштікті насихаттау, денсаулық сақтау және білім беру мәселелері секілді тақырыптарды қамтыған. Конкурсанттарға қойылған тағы бір талап - жұмыстарында Қазақстан Республикасы Тәуелсіздігінің 25 жылдығына және ЭКСПО-2017 көрмесіне арналған элементтерді пайдалану. Байқауға Астанада тұратын, білім алатын немесе жұмыс істейтін адамдар қатысады. Ең жас суретшінің жасы  9-да болса, ең ересегі – 25-те. Жеңімпаздарды арнайы комиссияның мүшелері іріктейді. Олар бір апта бойы үздік жұмыстарды таңдайтын болады. Байқау қорытындысы 7 қарашада шығарылып, жеңімпаздарға дипломдар мен бағалы сыйлықтар табыс етіледі. Ал ең үздік жұмыстар аталған тақырыптар бойынша жарнамалық конструкцияларды дайындауда пайдаланылып, қала көшелеріне орналастырылады.