Қазақ күресі федерациясы арнайы сертификат алды

Қазақ күресі ҚР Денешынықтыру-спорттық ұйым ретінде мойындалды. Бұл туралы ҚР Президент жанындағы ҚСЗИ директоры Ерлан Қарин өзінің әлеуметтік желідегі парақшасында мәлімдеді. Алдағы жылы әлем барысын өткізуді жоспарлап отырған Қазақ күресі федерациясы бүгін Ұлттық Олимпиада комитетінің арнайы сертификатын алды. «Бүгін ұлттық спортымызда елеулі күн. Қазақстан Республикасы қазақ күресі федерациясы ресми түрде Ұлттық Олимпиада Комитетінің тану туралы сертификатын алды. Осылайша федерация ұлттық спорт түрі бойынша Қазақстан Республикасының дене шынықтыру-спорттық ұйымы ретінде танылды. Бүгін Ұлттық Олимпиада Комитетінің отырысында аталмыш ұйымның атқарушы директоры Серік Қасқабасов тану туралы сертификатты ҚР Қазақ күресі федерациясына табыстады. Бұл төл спортымызды жаңа деңгейге көтерудегі тағы бір игі қадам. Отандық спортты көтеруде және оны халықаралық аренада беделін арттыруға жұмыс істеп жатқан Олимпиада комитетінің қолдауы ұлттық күресімізге жаңа қарқын бермек» - деп жазады Ерлан Қарин.