1430 шақырым және 9 күн

Офицер Шымкент – Астана аралығын велосипедпен жүріп өтті Оңтүстік Қазақстан облысы бойынша Мемлекеттік кірістер департаментінің экономикалық тергеу қызметінің офицері Сәбит Мұстафаев Тәуелсіздігіміздің 25 жылдығы құрметіне Шымкенттен Астанаға велосипедімен барды. Ол бұл сапарын солтүстік өңірлерді аяз қыспай тұрғанда жасап үлгерді. Ал барды деп айтар ауызға ғана оңай, таспадай керілген тас жолда ерсілі-қарсылы қидаласқан машиналар, жаңбыр мен жел, төбені тескен ащы күн, қараңғы түн, аңқаны кептірген аңызақ, бәрінен өтуге тура келген. Ол 1430 шақырымды 9 күнде жүріп өтті. – Әрине, жолда қиындықтар болмай қалған жоқ, – дейді офицер. – Қап-қараңғы түнде велосипедпен келе жатқанда түрлі қорқыныштар болды. Сол кезде «Сәбит, өз елің, өз жеріңде жүріп келе жатырсың, неменеден тартынасың», деп көңілімді бастым. Отаныма деген сезімім қанаттандырды. Ата-баба армандаған тәуелсіздікке әркім әрқалай үлес қосады. Мен мемлекетіме деген құрметімді осылай көрсеттім. Сәбит Мұстафаев ершіктен түс­пейтін кәнігі велошабандоз емес. Кезекті еңбек демалысын пайдаланып, осы іске тәуекел еткен. Тәу­елсіздікке құрметтің үлкен-кіші­сі болмайды. Офицердің үлгісі осы. Бақтияр ТАЙЖАН, «Егемен Қазақстан» Оңтүстік Қазақстан облысы