Алматыда «Жыл таңдауы» – үздік әндер бәйгесі мәреге жетті
Кеше «Алматы-Арена» мұз айдынында қорытындыланған «Қазақстан» телерадиокорпорациясының осынау жобасы көз алдымызда жүрген өнер майталмандарының егемендік жылдары бедеріндегі есебі болды десек те болады.
Аяқталып бара жатқан жылдың ең үздік әндерін анықтауды мақсат тұтқан биылғы жобаның айырмашылығы – ол Тәуелсіздіктің 25 жылдығымен тұспа-тұс келіп отыр. Сондықтан мерейлі шараға үлкен мән беріліп, арнайы сараптау комиссиясы құрылып, яғни 50-ге тарта адамнан тұратын қазылар алқасы 160 әншінің ішінен топ жарған таланттарды таңдады.
Алты сағатқа созылған телевизиялық түсірілім барысында 65 әнші сахнаға шықты. Олардың қатарында шетелдік қонақтар – Бурай мен Қытайды бағындырған қазақ әншісі Арай да болды.
Роза Рымбаева, Мақпал Жүнісова, Мәдина Сәдуақасаова, Гүлнұр Оразымбетова сынды сахна саңлақтары тыңдармандарын ерекше нөмірлермен толқытты. Мысалы, Розаның аспанда қалықтатып ән айтуы, Айқынның биіктікте сальто жасауы, сол сияқты Бурайдың Төреғали Төрәлі репертуарындағы «Бір түрлі қыз» бен Қайрат Нұртастың «Байқа» әнін түрік тілінде нәшіне келтіріп шырқауы шынында да көрермендерге қуаныш сыйлады.
Ең қызығы, бастары дауға қалып жүрген «Ninety One» тобы телевизиялық шоу режиссерлерінің талабын орындап, костюм-шалбар, ақ жейдемен сахнаға шықты. Әбден сынға ұшыраған топ бірінші рет беттеріндегі бояуын өшіріп, сырғаларын шешіп өнер көрсетті. Осылайша жастарымыз қазақ эстрадасының сахнасын, алдыңғы өнер буынын сыйлайтындарын білдірді.
Жоба жүлделерді орындарға бөлген жоқ. Халықтың көз алдында жүрген 30 бірдей танымал өнер иесі Тәуелсіздіктің 25 жылдығына орай жүлдегер атанды. Ал Сара Тыныштығұлова, Ескендір Хасанғалиев, Рамазан Стамғазиев, Роза Рымбаева, Мақпал Жүнісова сынды сахна саңлақтары өнерге сіңірген еңбегі үшін бөлек марапатталды. КВН СПАРТА командасы арнайы жүлдеге ие болды. Ерекше орындаушылығымен көзге түскен жас әншілерге «Жыл таңдауы» алтын кубогы табысталды.
Шетелден келген қонақтар – түрік әншісі Бурай мен Арай да атаусыз қалмады. Айтқандай, Бурайдың «Istersen» әні хитке айналып, дүниежүзі чаттарына енгенін әнсүйер қауым білсе керек?! Есімі музыка әлемінде 2004 жылы естілгенімен, ол әнді кейін айта бастаған. Алғашында түрік поп-музыканттардың әндеріне аранжировка жасаумен айналысқан Бурай бүгінде ерекше дауысымен, сұлу әнімен миллиондаған өлеңсүйер қауымның жүрегін жаулады.
Сондай-ақ, онлайн-дауыс беру арқылы да танымал үздік әндердің «Жеңімпаз Кубогы» иелерін тапты. Ал дауыс жинау 2 қарашадан басталған.
Кеш барысында 2016 жылдың тек үздік әндері шырқалсын деген мақсат болған еді. Сахна төрінде салтанат құрған 65 әнші бұл талаптың үдесінен шықты.
«Қазақстан» телерадиокорпорациясы «Жыл таңдауы» атауымен талай музыкалық шаралар өткізіп жүрсе де, бұл жолғысы өзгеше болғанын атап өту керек. Ең бастысы, бұл соңғы шоу отандық мамандардың өз күшімен өткізілді. Техникалық жағынан да ерекше жоба болды. Кешті екі бірдей 2 ПТС, 27 камера түсіріп жатты.
Әншілерді айтпағанда, шығармашылық топ та, техникалық қызметкерлер де қазақстандықтар болды. Яғни бұл жобаны енді толыққанды ұлттық музыкалық шоу деп айтуға қақымыз бар.
Жылдың ең жарқын жобасында өнерпаздардың барлығы әндерін тек жанды дауыста орындады. Ел тарихындағы тұңғыш ұлттық музыкалық бәйгеге көңілді тапқырлар клубының командалары да қатысты.
Осылайша, жуырда ғана пайдалануға берілген «Алматы-Арена» мұз айдыны 10 мыңнан аса тыңдарманды аясына сыйдырып, әуелеген әнге бөледі.
Айнаш ЕСАЛИ,
«Егемен Қазақстан»
АЛМАТЫ