Ақмола облысында кадрлық өзгерістер болды

Бүгін Ақмола облысы әкімдігінің отырысында аймақ басшысы Сергей Кулагин ұжымды кадрлық өзгерістермен таныстырды, деп хабарлайды облыс әкімдігінің баспасөз қызметі. Аймақ басшысы алдымен өз қызметіне қайта кіріскен Ақмола облысы әкімінің орынбасары Асхат Қайнарбековті құттықтады. Ол «Болашақ» бағдарламасы бойынша АҚШ-тың Колумбия университетін «экономика» мамандығы бойынша Мемлекеттік басқару магистрі дәрежесінде оқуын сәтті аяқтап, бүгінде өз қызметіне қайта кірісті. Әкім орынбасары облыстың кәсіпкерлік, өндіріс және туризмді дамыту сияқты маңызды салаларына жетекшілік ететін болады. Сондай-ақ, басқосу барысында аймақ басшысы жиналғандарға Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының үстіміздегі жылдың қазан айындағы бұйрығымен тағайындалған Сыбайлас жемқорлыққа қарсы іс-қимыл ұлттық бюросының (Сыбайлас жемқорлыққа қарсы қызмет) Ақмола облысы бойынша департаментінің басшысы Шыңғыс Қабдолланы және осы агенттіктің Ақмола облысы бойынша департаментінің басшысы, Әдеп жөніндегі кеңес төрағасы Берген Беспалиновті де таныстырды. Облыс әкімі өз жұмысына кіріскен мемлекеттік қызметкерлердің жұмыстарына сәттілік тілеп, ел Тәулсіздігінің нығаюына бар күш-жігерлерін аямай еңбектенуге шақырды.