Батыс Қазақстанда тұрғын үй салуға 17 млрд теңге бөлінді

Батыс Қазақстан облысында биылғы он айда құрылыс жұмыстарының көлемі 9 пайызға өсті, деп хабарлайды egemen.kz «ҚазАқпаратқа» сілтеме жасап. Облыс әкімі Алтай Көлгіновтің айтуынша, Ұлттық қор мен мемлекеттік бюджеттен құрылысқа барлығы 20 млрд теңге бөлінсе, соның ішінде тұрғын үй құрылысына 17 млрд теңге, әлеуметтік нысандарға 2,8 млрд теңге, сумен қамту нысандарына 434 млн теңге бағытталған. «Жеке инвестицияны қоса алғанда, барлық қаржы көздері есебінен 210 мыңнан астам шаршы метр тұрғын үй тұрғызылды, бұл - жылдық жоспардың 111 пайызы. 2020 жылға дейінгі өңірлерді дамыту, «Бәйтерек» холдингі, мемлекеттік-жеке әріптестік бағдарламалары аясында жыл соңына дейін 14 көп пәтерлік үй (1265 пәтер), Бөкей ордасы мен Жаңақала аудандарында 22 бір пәтерлік үй, барлығы 1500 пәтер пайдалануға берілмекші. Бұл ел Тәуелсіздігінің 25 жылдығына орай пәтер иелері үшін жақсы тарту болмақ», деді аймақ басшысы.