Мәуліт мүбәрак болсын!

Алматыдағы Балуан Шо­лақ атындағы спорт сара­йын­да Қазақстан мұсыл­ман­дары діни басқарма­сы­ның ұйымдас­тыруымен Мәу­літ мерекесі аталып өтілді. Онда Алла­ та­ға­ла­ны ұлық­тап, барша мұсыл­ман қауымы ардақ тұтар Мұхаммед Пайғамбарымызға (с.ғ.с) салауат, мадақ жыр­лар мен әндер айтылып, оның өнегелі өмірі барынша на­си­хат­талды. Былтырғы жылы Республика сарайында өткен Мәулітке келген жамағат аузы-мұрнынан шы­ғып, сыймаған болатын. Соны ескерген болуы керек, діни бас­қарма биыл 5 мың адамға арнал­ған Спорт кешенін таңдапты. Бірақ, бұл жолы да сарайда ине шаншар орын болмады. Содан бірқатар ағайын төрт сағатқа жуық тапжылмай тұрып Мәуліт тыңдады. Бұл дегеніміз – Қазақ­станда Мәуліт мерекесі жыл өткен сайын бүкілхалықтық сипат алып келе жатқанын айғақ­таса керек. Ең бастысы, Мәуліт­ті атап өтуде ұйымдастырылған іс-шаралар мазмұн жағынан ба­йып, исламның асыл құндыл­ық­тарын насихаттауда түрлі тақы­рыптар қамтылып, халықтың ынта-ықыласын арттыруда. – Қазір әлемде 6 миллиард халық бар, – деді құран оқылған соң мұқым халықтың, Отанның қа­мында жүрген азаматтардың аман­дығын тілеп, бата жасаған Қа­зақстан мұсылмандары діни бас­қармасының төрағасы, Бас мүф­ти, шейх Әбсаттар қажы Дер­бісәлі. – Оның 2 миллиарды мұсылман болса, бүгінде олар осы Мәуліт айын тойлауда. Мәу­літ араб тілінде «туылған күн» деген мағына береді. Бұл Алла та­ғаланың ең сү­йікті пендесі, Адам атадан бастал­ған пайғам­барларымыздың соң­ғы­сы, әрі сар­дары хазіреті Мұхам­мед­тің дү­ниеге келген күніне атау етіп қойылған сөз. Одан әрі Әбсаттар қажы биыл Қазақстан Ислам конференциясы ұйымына төрағалық ететінін айта келіп, бұл елеулі оқиғаға қатысты да өз ойын ортаға салды. Осының барлығы ынтымақтың, бірліктің арқасында екенін, «бірлігі бар ел озатынын, бірлігі жоқ ел тоза­ты­нын» еске салды. Содан кейін Мәу­літ жыры оқылып, Пайғам­бары­мызға қариялар салауат айт­ты. Биылғы мерекенің жаңалығы, бес мың адам­ға Діни басқарма мен Ислам мә­де­ниеті және білімін қолдау қоры­мен бірлесіп шығарған бірнеше кітаптарды сыйға тартуы болды. Салауат айтылған соң мем­­лекет және қоғам қайраткері, академик Сұл­тан Сартаев халық­қа бата берді. Жалпы Мәуліт мерекесі алғаш рет 909 жылы Мысырда баста­лып, 1207 жылдан ресми түрде атап өтілген. Ал XVІ-XVІІ ға­сырларда Осман империясы­ның ресми мейрамы болып бекітілген. Қа­зақ­станда бұл мереке 2000 жыл­дан белсенді өткізіле баста­ды. Биыл­ғы Пайғамбардың дү­ние­­ге келген күні 14 ақпан мен 14 нау­рыз ара­лығында еліміз бо­йынша үлкен­ді-кішілі елді-мекен, қала, аудан, облыс орта­лық­тарында аталып, ме­рекелену үс­тінде. Мереке барысында Пайғам­бары­мыз туралы түсірілген бейнефильм ұсынылып, кештің өн бойы мадақ ән-жырмен көмкері­ліп отыр­­д­ы. Әсіресе, Жәкен Ома­ров­тың «Хикметулла», «Зі­кі­­рул­ласы­на» жұртшылық ерекше ықы­­лас танытты. «Серілер», «Меломан», «Рояль» тобының өнерлі жігіттері де әндерімен сүй­іспенші­л­іктерін біл­дірсе, «Сәт» триосы­ның орын­дауын­дағы «Мі­нәжат», «Көнеміз ғой» әндері де тыңдар­манын тәубе етуге ша­қырғандай еді. Биылғы Мәуліттің тағы бір жа­ңалығы – танымал ақын­дар Балғынбек Имашев пен Жандарбек Бұлғақовтың дін та­қы­рыбындағы айтысын жұрт­шы­лықтың жылы қабылдауы. Со­ны­мен бірге көкшетаулық ай­тыс ақы­ны Арман Бердалин, Құр­ман­ғазы атындағы Ұлттық консерватория студенті Ермек Есқожаев мадақ жырларын ар­нады. Пайғамбарымыздың хадисінің бірінде: «Кім маған бір рет салауат айтса, Алла тағала оған он рет рахмет жолдайды, оның он күнәсі кешіріліп, он дәрежесі көтеріледі» деген. Ендеше, әр мұсылман жүрегіндегі ұлы Алла мен ардақты Пайғамбарымызға деген сүйіспеншіліктің сағыныш сезімінің орны өзге ештеңемен толықпасы хақ. Гүлзейнеп СӘДІРҚЫЗЫ.