Қазіргі дүниедегі кез келген мемлекет өзінің алғашқы қадамын Тәуелсіздігімен қатар, Конституциясын қабылдаудан бастайды. Бұл – сол мемлекетті құраушы ұлттың ғасырлардан жинақталған өзіне тән ұстанымының, заңдарының, жүрген жолдарының өзегінен өрбитін, келешегіне бағдар жасайтын басты белгі. Осыдан 21 жыл бұрын жаңа Конституция қабылданып, еліміз жасампаз жаңа дәуірге нық қадам басты. 1995 жылдың 30 тамызында, жалпыхалықтық референдумда Қазақстан халқы Конституцияны қабылдауға дауыс беріп, өздерінің ортақ мағыналы таңдауын – тәуелсіздікті, өркендеуді, демократияны қолдады.
Құжатты әзірлеуге Елбасы Н.Назарбаев тікелей ат салысып, білікті заңгерлер мен шетелдік мамандар қатысты. Тәуелсіздік тарихында тұңғыш рет бүкілхалықтық талқылауға салынған да, елдің көптеген пікірі естілген Негізгі Заң да осы Конституция. Бұл жөнінде Президент: «1995 жылы Конституция тақыр жерден пайда болған жоқ. Ол егемен Қазақстанда конституциялық құрылыс орнату үшін бұрыннан жинақталған тәжірибелерді, сондай-ақ біздің жағдайымызға сәйкес келетін ең прогресшіл шетелдік тәжірибелерді барынша толық пайдаланған еді. Сондықтан да, кімде-кім еліміздің Негізгі Заңының рухы мен маңызын терең түсінгісі келсе, оны жасаудың, қалыптастырудың тарихын жақсы білуі керек», деген болатын.
Бүгінгі біздің жетіліп келе жатқан, ел тарихын бес саусағындай білетін жас ұрпаққа осы Конституциямыздың темірқазығы сонау «Есім ханның ескі жолы, Қасым ханның қасқа жолы», Тәуке ханның «Жеті жарғысынан» бастау алғандығын да айта кеткеніміз жөн.
Конституция еліміздің Негізгі Заңы ретінде егемендігіміздің тұрақты дамуының, қоғам, мемлекет тұрақтылығының іргетасы болды. Осы 1995 жылы қабылданған Ата Заңымыздың басты құндылығы республиканың өзін демократиялық, зайырлы, құқықтық және әлеуметтік деп жарияланумен қатар, негізгі бастауы халық екендігін айқындап берді.
Еліміздің бұл Негізгі Заңы бірінші рет Қазақстан Республикасын президенттік басқару нысанындағы біртұтас мемлекет деп жария етті. Заңды мемлекеттің құзырына өз аумағының тұтастығын, сырттан қолсұғылмауын және бөлінбеуін қамтамасыз ету толығымен жатқызылады.
Конституцияда демократияның түпкі мәні ерекше айқындалады. «Мемлекеттік биліктің бірден-бір бастауы – халық» деп нақты жазылған.
Конституцияда республикадағы мемлекеттік билік біртұтас деп тұжырымдалған. Сондай-ақ, осы жылдары демократияның маңызды институты – парламентаризмді дамыту үшін барлық жағдай жасалды.
Жалпы, Ата Заңымыздағы ең басты құндылық – бұл адамның құқығы мен еркіндігін қорғау болып табылады. Әр адам осы елде өмірге келіп, тұрмыс-тіршілік жасап жатқандықтан, оларды тіліне, түріне және нәсіліне қарап алалау жоқ. Байырғы қазақ жерінде тағдырлары тоғысқан барлық ұлттар мен ұлыстардың ынтымағы жарасып, ортақ мүдде жолында өмір сүріп жатқаны біздер үшін баға жетпес құндылық саналады.
Жаңа Конституцияның тағы бір басты артықшылығы – меншіктердің әралуандығын мойындап, оны заң жүзінде бекітуі. Енді Қазақстан Республикасында мемлекеттік меншікпен қатар жекеменшік те өз күшіне еніп, заңмен қорғалуда.
Мемлекетіміздің басты заңы конституциялық құқықты қорғаудың, Негізгі Заңның құқықтық өрісін және тұрақтылығының қосымша кепілдігі ретінде прокурорлық қадағалаудың рөлін бекітті. Осы түпмәтінде прокуратураның құқық қорғау қызметінің басты бағыттарының бірі конституциялық заңдылықты, Қазақстан Республикасының Президенті Жарлықтарының және өзге де нормативтік құқықтық актілердің дәлме-дәл әрі біркелкі қолданылуын жоғары қадағалауды жүзеге асырады, заңдылықтың кез келген бұзылуын анықтау мен жою жөнінде шаралар қолданады, сондай-ақ заңдар мен басқа да құқықтық актілерге наразылық білдіру Конституцияға сәйкес прокуратура органдарына жүктелген.
Үстіміздегі жылы өңірдегі 11 мыңнан астам азаматтың, соның ішінде 4 мың жасөспірімнің конституциялық құқықтары қорғалды. Еңбек қатынастарының бұзылуына байланысты қолданылған шаралар нәтижесінде 77 миллион теңгеден астам жалақы қарызы қайтарылды. Прокурорлық ықпал ету актілері бойынша мемлекеттік бюджетке 1,5 млрд теңгеден астам қаражат құйылды. Бір ғана мысал айтайын, Еңбекшілдер ауданы прокурорының ұсынысы бойынша «Көкше-Цемент» ЖШС-не 700 миллион теңгеден астам қосымша салық есептеліп, бюджетке төленді.
Сондай-ақ, прокурорлық қадағалау шаралары арқылы мемлекеттік сатып алудың қорытындысы бойынша 1 миллиард теңге бюджет қаражатын заңсыз жұмсаудың және пайдаланудың жолы кесілді.
Мемлекеттік қызметтің беделін түсіретін теріс қылықтары үшін, прокурорлық ықпал ету актілері бойынша 14 лауазымды тұлға, соның ішінде 11 басшы тәртіптік жауапкершілікке тартылды.
Табиғат ресурстарын қорғау мақсатында облыс прокуратурасы Астана қаласы маңындағы аймақта кең таралған пайдалы қазбаларды заңсыз өндіруге қарсы іс-әрекет бойынша іс-шараларды іске асырудың Жол картасын әзірледі. Соның шеңберінде облыс прокуратурасының бастамасымен Қоршаған ортаны ластаудан келтірілген залалды экономикалық бағалау ережесіне өзгерістер мен толықтырулар енгізілді.
Прокуратура органдарының қызметі кәсіпкерлердің құқықтарын нақты қорғауды қамтамасыз ету, соның ішінде заңдық талаптарды бұзушылыққа жол бермеу арқылы түпкілікті нәтижеге қол жеткізуге бағытталды. Бұл орайда, «Шенеунік және кәсіпкер», «Прокурор түсіндіреді» акциялары тұрақты өткізіліп келеді. Сондай-ақ, «Қылмыстық процесте кәсіпкерлердің құқықтарын қорғау» қанатқақты жобасының кіріктірілуі маңызды сипат алуда. Жобаның мақсаты кәсіпкерлерді қылмыстық процеске негізсіз тартуға мүмкіндік туғызатын жағдайларды жою болып табылады.
Прокуратураның уәкілетті мемлекеттік органдармен бірлесіп жүргізген алдын алу жұмысы кәмелетке толмағандардың арасындағы қылмыстардың 123-тен 93-ке дейін азаюына мүмкіндік берді. Облыс прокуратурасының бастамасымен «Қауіпсіз ғаламтор», «Құрбан болмау үшін нені білу қажет» бағдарламаларының әзірленіп, іске қосылуы жұртшылық ықыласын тудырды.
Прокуратура азаматтардың өз құқықтарын қорғау үшін жүгіне алатын қолжетімді мемлекеттік органдардың бірі болып табылатынын атап өту қажет. Прокурорлар әрбір азаматты тыңдап, бұзылған құқықтарын қалпына келтіру бойынша шара қабылдауға әзір. Жыл сайын Ақмола облысының прокуратура органдарына 10 мыңнан астам азамат және 2,5 мыңдай заңды тұлға жүгінеді. Бізде прокуратура органдары ардагерлерінің қоғамдық қабылдауы белсенді жұмыстар атқарып отырғанын айтқым келеді. Бұл ақмолалықтардың прокурорлық қызметке деген сенімінің артқандығын білдіреді.
Қадағалау қызметінен басқа, ел Тәуелсіздігінің 25 жылдығының құрметіне Ақмола облысының прокуратурасы 25 қоғамдық-маңызды іс-шаралар атқаруды жоспарлы түрде жүргізуде. Бұл «Жасыл болашақ» жасампаздық акциясымен басталды.
Біздің басты міндетіміз Тәуелсіздігіміздің тірегі – Конституциямыздың маңыздылығын бір сәтке де жоғалтпай сақтау. Ата Заңды құрметтеу –Тәуелсіздігіміздің ұлы мұраттарынан өрбитін жалпыхалықтық ортақ ұстанымды ертеңгі күнге еңселендіріп жеткізу деген сөз.
Мұратбек ИСАДИЛОВ,
Ақмола облысының прокуроры, мемлекеттік әділет кеңесшісі
Ақмола облысы