Сайлау жоғары деңгейде өтеді

Кеше Қазақстан Республикасының Мемлекеттік хатшысы – Сыртқы істер министрі Қанат Саудабаев Еуропа Кеңесі Парламенттік Ассамблеясының Президенті Мавлют Чавушоғлумен телефон арқылы сөйлесті, деп хабарлады ҚР СІМ-інің баспасөз қызметі. Әңгімелесуші тараптар Қа­зақстан мен Еуропа Ке­ңе­сінің Парламенттік Ассам­блея­сы арасын­дағы ынты­мақ­тастық мәселелерін және оның нығаюы мен кеңеюін талқыға салды. 3 сәуір күні Қазақстан Рес­публикасының кезектен тыс президенттік сайлауы ел­дің демо­кра­тияға қарай жа­са­ған маңызды қадамы деп та­ни­мыз, деді өз сөзінде М.Чавушоғлу. Осыған бай­ла­­ныс­ты Еуропа Кеңесінің Парламенттік Ассам­блеясы сайлау­ды байқауға өз тарапынан ар­найы делегация жолдауға шешім қабылдап отыр. Өз кезегінде Қ.Саудабаев әңгімелесуші тарапқа қабыл­да­ған шешімі үшін алғысын жеткізе отырып, алдағы сай­лауға халықаралық қоғам­дас­тық өте үлкен көңіл бөліп отырғанын атап өтті. ЕҚЫҰ Адам құқықтары жөніндегі бюросы, ТМД Атқарушы комитеті, Ұжымдық қауіпсіздік шарты ұйымы Парламенттік Ассамблеясы, ИКҰ, ШЫҰ және басқа да халықаралық ұй­ымдар өз байқаушыларын жол­дап отырғаны осының айқын дәлелі болып табы­ла­ды. Сонымен қатар, сыртқы саясат ведомство басшысы Қазақстанда олардың жұмыс жасауына және сайлауды халықаралық талаптарға сай өткізуге толық жағдай жасалғанын ерекше атап айтты. Мәжіліс Бюросының кезекті отырысы Кеше Парламент Мәжілісінің Төрағасы Орал Мұхамеджановтың жетекшілігімен палата бюросының кезекті отырысы өтті. Онда Мәжілістің жалпы отырысына шығарылатын мәселелер сараланды. Палатаның Халықаралық істер, қорғаныс және қауіп­сіздік комитеті депутат­тар­дың талқысына бір топ заң жобаларын ұсынды. Атап айтқанда, «Патент құқығы туралы шартты ратификациялау туралы», «Шанхай ын­ты­мақтастық ұйымына мү­ше мемлекеттердің терроризмге қарсы құралымдары үшін кадрлар даярлау тура­лы келісімді ратификациялау туралы», сондай-ақ «Қа­зақстан Республикасы мен Италия Республикасы ара­сын­дағы стратегиялық әріп­тес­тік туралы шартты ратификациялау туралы» заң жобалары бар. Бюро отырысында 27-29 наурыз аралығында Павлодар облысында индус­трия­лық саясаттың өзекті мәсе­ле­лері бойынша Мәжілістің Экономикалық реформа және өңірлік даму коми­тетінің көшпелі отырысын өткізу туралы қаулы қабылданды. Сонымен қатар, бюро отырысында Үкіметтен келіп түскен жаңа заң жоба­ла­рына қорытынды әзірлеу мәселелері қаралды. «Егемен-ақпарат».