Әлеуметтің әлеуетін көтеру жолында

Елордадағы журналистер үйінде Қазақстан Республикасының президенттігіне кандидат Жамбыл Ахметбековтің «Жамбыл Ахметбековтің халықтық үш бастамасы» атты жаңа сайлауалды бағдарламасына арналған баспасөз мәслихаты өтті. Жиынға Қазақстанның Коммунистік халықтық партиясының өкілдері, журналистер қатысты. Шара барысында ел президенттігінен үміткер сайлаушылар амана­тына сүйене отырып, кедейшілік, жұ­мыссыздық, тарифтердің өсуі сынды мәселелерді қозғады. «Жаңа әлеуметтік бағыт шең­бе­рін­дегі бірінші бастама» – бұл күн­кө­ріс­тің ең төменгі көрсеткішін көпте­ген өркениетті елдерде қолданылатын стандарттар бойынша анықтау әдісін енгізу. Аталған әдіс халықтың кем дегенде жартысы тұтынатын тауарлар мен қызметтерді ең төменгі тұтыну бюджетінің құрамына қосуға негізделген. Орта есеппен алғанда Қа­зақ­стан үшін ол адам басына шаққанда 200 000 теңгені құрайды. Мысал ретінде қарас­тырсақ, дамыған елдерде халықтың орташа табысының 40-50 пайызы кедейліктің ең жоғарғы шегі болып есептеледі», – деді кандидат өз сөзінде. Сондай-ақ, ол қазақстандық жоға­ры оқу орындары түлектерінің бірінші рет жұмысқа орналасуларына мемлекеттік кепілдік беруді енгізуге бас­та­машы болатынын айтты. «Бірінші жұмыс орнына кепілдік беру жас маманнан жұмысқа орналасуы кезінде ма­мандығы бойынша 3 жыл жұмыс өтілін сұрау секілді кедергіден шы­ға­рар жол болып табылады. Басы артық оқу орындары, мамандығы бойынша жұмыс істеу, дипломы бар жұмыс­сыз­дар, кәсіби біліктілігінен айырылу, жұмыссыздар саны мен білікті кадрларға деген сұраныстың сәйкес келуі – бүгінгі күннің көкейкесті мә­се­лесі, проблемалары. Қазақстан – хал­қы жас мемлекет. Сондықтан әрбір азамат өзін өзі қамтамасыз ету мүм­кін­дігіне ие болуы тиіс», деген ойын жет­кізді бұл турасында Ж.Ахметбеков. Кандидат өзінің сайлауалды бағ­дар­ламасына сәйкес Қазақстанның тұр­ғын үй-коммуналдық шаруашы­лы­ғы мәселесін де көтерді. «Елімізде жүр­гізіліп отырған тұрғын үй-ком­му­нал­дық шаруашылық саясаты құры­лыс, коммуналдық және энерге­тика­лық монополияларды байытуға бағыт­тал­ған. Тұрғын үй-коммуналдық ша­руа­шылық қызметтердің тарифтері мен бағалары өте жоғары және үздік­сіз өсу үстінде, ал олардың сапасы ба­ға­ларына сәйкес келмейді. Халықтың коммуналдық төлемдерді төлеуге мүм­кіндіктері азайып отыр. Үшінші бастамам ретінде тұрғын үй-комму­нал­дық шаруашылық саласының тарифтері мен бағаларын азайтуды ұсынамын», деді президенттіктен үміткер. Ж.Ахметбеков аталған үш ба­ғыт­тың елдің саяси келбетін, оның даму жолын өзгертетініне, «әлеуметтік мем­лекет» конституциялық форму­ла­сына сәйкес келтіретініне сенетінін жеткізді. Ләйла ЕДІЛҚЫЗЫ. ------------------------------- Суретті түсірген Орынбай БАЛМҰРАТ.