16 Наурыз, 2011

Жапониядағы жағдайға да жаны ауырады

310 рет
көрсетілді
2 мин
оқу үшін
Бұрнағы күні оңтүстік астанадағы Бостандық ауданының №6 өрт сөндіру бөлімінде болған кезінде ел президенттігіне кандидат Ғани Қасымов Патриоттар партиясының, өз сайлауалды штабының және өтініш айтқан сайлаушылардың атынан осы күндерде жер сілкіну зілзаласының зардабын  бастан кешіріп жатқан жапон халқына жан күйзелісін білдіріп көңіл айтты. Сөйтіп, қазақстандықтарды қиындықта қалған елге   қолдан келгенше қолұшын беруге шақырды. Аталған өрт сөндіру бөлі­мі­не үміткер бекерден бекер келген жоқ. Ол төтенше жағдай бола қалған кезде өрт сөндіру­шілердің адамдарға жедел әрі ұтымды көмекке келу әзірлі­гі­нің қандай екендігіне көзін жеткізуді мақсат тұтты. Президенттіктен үміткерге Алматы қаласы бойынша тө­тен­ше жағдайлар департаменті өрт сөндіру және апаттық-құтқару жұмыстары қызметінің бастығы подполковник Асқар Тойшы­бе­ков төтенше жағдай­ларға әзір­лік­тің жайын баяндап берді. Қазір қалада 14 әскери өрт сөндіру бөлімі жұмыс істейді, ірі кәсіп­орындар мен ұйымдарда оннан астам ерікті бөлімшелер құ­рыл­ған. Олар­дың бәрі техникамен, жаб­дық­пен, жеке қорғаныс құ­рал­дар­ымен жеткілікті деңгейде жаб­дық­талған. Айталық, өткен жылы өрт сөндірушілер «Мерседес» автомашинасының негізіндегі төрт автоматты көтер­гіш­пен жарақтанды. Ғ.Қасымов өрт сөндіруші өрендермен әңгімелесіп, жаб­дық­тарды көрді. Сонымен қа­тар, ол Алматы сияқты үлкен мегаполисте өрт сөндіру бөлім­шелерінің әлі де болса жеткіліксіздігін атап көрсетті. Бұл күнде қалалық әкімдік Алатау ауданында қосымша екі бөлім құруда. Таяу уақытта тағы да бес өрт сөндіру кешенін салу үшін жер телімдері бөлінбек. Президенттіктен үміткер олар­дың қаржыландырылуын, құ­ры­лыстың жедел басталуын қа­дағалауға уәде етті. Сондай-ақ азаматтарымызды қорғайтын өрт сөндірушілердің тұрмыс­тық жағдайы мен жалақысы ерен де ер еңбекке лайықты болуы қажеттігін ескертті. Қорғанбек АМАНЖОЛ. Алматы. ------------------------------- Суретті түсірген Юрий БЕККЕР.