Алты жылда – алты шығарма

Бүгінгі қазақ қоғамында өзіндік орны бар, сан алуан пікір мен ой додасының қайнаған ортасында шаршамай жүрген Зәкір Асабаев ағамыздың қазақ журналистикасына сіңірген елеулі еңбегіне тоқтамай өту мүмкін емес. Ұзақ жылдар «Мәдениет және тұр­мыс» журналының жа­уап­ты хат­шысы қызметін атқарды. Қазақ­стандағы бұл басылымның қазақ оқырманына 520 мың (!) данамен таралған жылдары осы Зәкең ағамыздың журналдың «бас штабын» басқарған кезімен тұспа-тұс келіп тұруының өзі де көп жайтты аңғартса керек. Алпыс жыл бойы ақ параққа шұқшиып, сөз маржанын терген көсемсөзші, прозашы ағамыздың бүгінгі таңдағы қаламгерлік-еңбекқорлығы қасиеті емей немене – соңғы алты жылда айтары мол алты кітап шығарып та тастапты. Әдебиет майталманын әде­биет­шілердің Алматыдағы ақор­дасында құрметтеу салтанаты да айрықша ізетпен өтті. Ресми баяндама жасалынған жоқ. Қазақстан Жазушылар Одағы басқармасының атынан  басқарма бастығының орынбасары Жа­нар­бек Әшімжан құттықтап, қаламгерге лайықты сый-сияпат жасады. Белгілі ғалымдарымыз Зейнолла Әйтімов, Нұриддин Балқияев  Зәкеңнің көпке, әсіресе жас буынға ұлағат болар  болмысы мен табиғаты туралы, шы­ғар­маларының қоғамдық сипаты туралы әңгіме шертті. Танымал жазушылар Бексұлтан Нұржеке, Ахметжан Әшіри, Сатыбалды Нарымбетов, Жа­қау Дәуренбеков, Мағира Қожахметова  қаламгер-қай­раткер Зәкір Асабаевтың шы­ғар­машылығы, өмірдегі шынайы болмысы туралы жарасымды да жағымды пікірлерін ортаға салды. «Дәстүр» баспасынан –  «Ешкім білмейтін айла», «Білім» баспасынан – «Өмір өрнектері», «Ана тілі» баспасынан – «Маэстро», Герольд Бельгер аудармаларын қазақша аударған, мемлекеттік тапсырыс­пен жарық көрген кітаптарының қай-қайсысы  да оқырманның жүрегінен орын алары сөзсіз деген тұжырым жасалды. Салтанат үстінде шиырып сөз сөйлеген құрмет иесі күн­делікті өмірде тілектес, ниет­тес жүрген достары мен қалам­дас інілері Амантай қа­жы мен Өріс­бек Шомановқа, Жақсыбай Қасымбеков пен Оңғар Исаевқа, ақын, драматург, сазгер Мырзахан Ах­ме­товке  және басқаларына шын кө­ңілден алғысын білдірді. Кәсіпкер Арыстан Жұмағұлов пен ақын інісі Қасымхан Бегмановқа ілтипатының ерекше екені туралы айтып өтті. Талғат СҮЙІНБАЙ, «Егемен Қазақстан» АЛМАТЫ