Қасымов: Уақытша тіркеуге байланысты тексерудің басқа жолын қарастырамыз

Ішкі істер министрі Қалмұханбет Қасымов уақытша тіркеуге байланысты есік ашпайтын қазақстандықтарды тексерудің басқа жолын қарастыратынын мәлімдеді. Үкімет отырысынан кейін журналистердің сауалына жауап берген Қалмұханбет Қасымов министрлік уақытша тіркеуден өтпегендерге айыппұл салуға әлі кіріспегенін айтты. Сондай-ақ «Азаматтың үйге келген полицейге есік ашпауға құқығы бар ма?» деген сұраққа: «Жарайды, ашпаңыздар, біз тексерудің басқа амалын табамыз», – деді. «Себебін өздеріңіз білесіздер, қазір Универсиаданы күтіп отырмыз. Сондықтан 4 қаңтарда жиналыс өткізіп, қалада жоспарлы түрде тексеріс басталды. Алғашқы айда тек ескерту жасаумен шектелеміз. Ал одан кейін тиісті шаралар қолданамыз. Уақытша тіркеу – бұл ең тиімді жолы. Мәселен, қазір Астанада пәтер алу үшін кезекте тұрған адам жұмыспен Атырауға баруы керек болды делік, сонда не істеуі керек? Біз оның тұрғылықты жеріндегі тіркеуден шығармай, барған жерінде де тіркеуге тұруға, жұмыс істеп, пәтер алуға мүмкіндік береміз» деді министр. Жақында басталған тексеріс Алматыдағы Универсиадаға байланысты жүргізілген. «Біз тек Алматыда тексеріс жүргіздік, ол уақытша тіркеу мәселесіне байланысты емес, бірақ өзге өңірлерде бұл іс жүргізілмеді. Алматыда заңсыз тұрып жатқандарды тексереміз» деді Қасымов. Айта кетейік, бүгін Үкiмет отырысында ҚР Премьер-министрi Бақытжан Сағынтаев тiркеу енгiзiлгеннен кейiн халыққа қызмет көрсету орталықтарында ұзын-сонар кезектiң қалыптасқанын, сондай-ақ жалпы тiркеудiң халық арасында наразылық тудырғанын айтты. Премьер-Министр тiркеуге қатысты сұрақтардың тым көп екенiн және түсiндiру жұмыстарының дұрыс жүргiзiлмегенiн де жеткiздi. Осыған байланысты жаңа бастамаға көшпес бұрын электрондық тiркелу жүйесiн әзiрлеу керектiгiн мәлімдеді.