«Морж» Жемге шомылады

Соңғы он жылдан бері Жарылқасын Байжанов деген азамат Жем өзеніне шомылады. Жылдың жылы мезгілі емес, қақаған қыста да өзен суына бір шомылмай, ішкен асы бойына батпайды. Өзінің айтуынша, әрине, бірден өзеннен үкі ойып, салқындығы дене қаритын суға сүңгімеген. Алдымен, қыс айларында денесіне шелекпен мұздай су құйған. Кейіннен қарға аунап, денесін ақ ұлпамен ысқылаған. Осылайша, ағзасын салқын суға үйреткен. – Қазір жасым 60-та, – дейді Жылыой ауданының Шоқпартоғай ауылында тұратын Жарылқасын Байжанов. – Қыс бойы өзен үстінде жалаңаяқ жүремін. Мұз араласқан суға шомыламын. Кешкі 6-дан кейін тоя тамақ ішпеймін. Салқын суға шомылғанымның нәтижесінде денсаулығым ойдағыдай. Қан қысымым тұрақты, бірде-бір сырқатым жоқ. Осының бәрі алдымен, өзімнің денсаулығым­ды сақтап, ауырмауым үшін қажет. Екіншіден, жастар­дың саламатты өмір салтын қалауына жол көрсеткім келді. Оның айтуынша, қазіргі жас жігіттердің арасында суыққа шыдай алмай, түрлі сырқаттарға шалдығатындар көбейіп барады. Мұның басты себебін олардың денесін салқын сумен шынықтыруға мән бермеуінен көреді. Ал өзі қыстың үскірік аязында өзенге шомылуды спорт­тың бір түріне жатқызады. Содан болса керек, оны ауылдас­тары «морж» деп атайды.  Жолдасбек ШӨПЕҒҰЛ, «Егемен Қазақстан»  Атырау облысы