Алматыға көктем келді

Иә, көктем келді дегенше, қазаққа наурыз келді десейші...   Ұлыстың ұлы күні – наурызды қазекем «күн мен түн теңескен қасиетті күн,  жаңа жыл, ырыс берекенің басы» деп санайды. Сол қасиетті күнді ырымдап, қалайда  айтулы етіп қарсы алуға қам жасайды. Міне, осы  халықтық  мейрамға бір жарым миллиондай  тұрғыны бар   күңгейдегі бас қала  ерте бастан дайын­далады. Бүгін біз Алматы қаласындағы  өндіріс, сауда орындары, әлеуметтік нысандары   көп орналасқан ең ірі Бос­тандық ауда­нын­дағы  дайын­дық барысымен танысу мақса­тын­да аудан әкімі Зәуреш АМАНЖОЛОВАҒА   жолыққан едік. – Зәуре Жұманәліқызы, биыл­ғы наурыз мейрамының жөні бөлек болғалы тұр. Кең бай­тақ Қазақстан көгінде көк бай­рағымыздың желбірегеніне 20 жыл толғалы отыр. Соған қа­рағанда, биылғы наурыз мей­рамын барынша мазмұн­ды, ба­рынша думанды өткізу­ге күш салып жатқан боларсыздар? – Иә. Біз дайындықты нау­рыз айының алғашқы күнінен бастап, атқарылатын іс-шара­лар­дың жо­ба­сын, жоспарын жасап, ықтият­тап алғанбыз. Онда ең алдымен, өт­кізілетін бағдар­ла­малардың мақ­сатын айқын­да­дық. Ол – жас­тарды пат­риот­тық, отансүйгіштік қасиет­ке баули отырып, өз мем­ле­кетінің та­рихына, ондағы тұратын Қа­зақ­стан халқының салт-дәс­түрін, мәдениетін танып білуге, сыйлауға үндеу. 10-ы наурыздан әкімдіктегі әр бөлім мерекелік іс-шараны өз саласы бойынша өт­кі­зу­ді бастап жі­берді. Мәселен, мә­де­ниет пен тілдерді дамыту бөлімі наурыздың 10 мен 21 аралығында ау­дандық кітапхана мен оқу орын­дары кітап­ханаларында тәуел­сіз­діктің 20 жыл­дық рәміздерін пайдалана оты­­рып, ұлттық мерекеге арналған кітап көрмесін, оқу­шы­лар кон­фе­рен­циясын, сазды-поэ­ти­калық кештер ұйымдастыруда. Сондай-ақ, «Атакент» кешенінде 22 наурыз күні аудандағы шы­ғар­машылық ұжымдар мен Қазақ­стан эстрада жұлдыздарының қа­тысуымен концерттік бағдарлама, мектеп оқу­шы­ларының қатысуы­мен ұлттық спорт түрлерінен жа­рыстар өткізіп, ауданға еңбегі сіңген азаматтарды марапаттап, Құрмет грамоталары мен алғыс хаттар табыстаймыз. Сондай-ақ, жоғары оқу орын­дарында тәуелсіздіктің 20 жыл­ды­ғы­на орай «Ұлыстың ұлы күні құт­ты болсын!» фестивалін өткіз­бек­піз. Аула клубтарының күші­мен мәдени-ойын сауық шара­ла­рын, сонымен қатар аудандағы ұлт­тық-мәдени орталықтардың қа­ты­суымен халық шығармашы­лы­ғы көрмесі ұйымдастырылады. Ал мектеп оқушылары арасында тәуелсіздіктің 20 жылдығы ая­сын­да «Көктем келді, Наурыз келді!» тақырыбында плакат, сурет салу бойынша және шығарма жазудан байқау өткізілмек. Және кішкене балақайлар арасында асфальтта сурет салудан да байқау ұйым­дас­тырылады. Ең бастысы – абат­тандыру бөлімі аудан бо­йын­ша барлық мекеме, кәсіпорын, ұйым­дармен бірлесе отырып, са­ни­тарлық тазалық жұмысын жүр­г­ізуге күш салады. Сонымен қатар «Атакентте» сауда мекемелері, кә­сіпорындар халық тұтынатын та­уарлар, ұлттық тамақтар түр­ле­рін, кулинарлық тәттілерді, сусын сату­ды ұйымдастырмақ. Әрине, нау­рыз көжесіз қандай мейрам бол­сын, Қазақстанда тұратын ха­лық­тардың ұлттық тағамдарын әзірлейтін аудандағы ең үздік мейрамханалар тегін наурыз көже, бауыр­сақ, палау, т.б. ас мәзірін ұсын­са, әлеуметтік сала бөлімі нау­­рыз мерекесіне орай жағдайы тө­мен, жалғызілікті, мүгедек, жетім балалар мен қарттарға арналған қайырымдылық акциясын өткізіп, жағдайы төмен зейнеткерлерге азық-түлік пакетін дайындап, ал мүгедектерге дәрі-дәрмек препа­рат­тарын таратады. Бәрін тізе бер­мей-ақ қояйын, басқа да іс-шара­лар наурыз айы бойы жүргізілмек. Әңгімелескен Гүлзейнеп СӘДІРҚЫЗЫ.