Вьетнам портына қазақстандық астық жөнелтілді

Жалтыр теміржол стансысынан Вьетнамның Хошимин портына «ҚТЖ» ҰК» АҚ контейнерлеріне тиелген қазақстандық астық жөнелтілді, деп хабарлады ҚТЖ-ның баспасөз қызметі. Жүк Ляньюнган порты арқылы барады. Астықтың пилоттық жөнелтілуін «KTZ Express» АҚ компаниясының еншілес кәсіпорны «Ляньюньган қаласының қазақ-қытай халықаралық логистикалық компаниясы» жауапкершілігі шектеулі қоғамдастықпен (ЖШҚ) бірлесе жүзеге асырды. «KTZ Express» АҚ вице-президенті Ержан Кулаков атап өткендей, астық қапқа салынып, контейнерлермен жіберілуде. Жөнелтілудің мұндай әдісі вагондап жіберумен салыстырғанда Достық стансысында контейнерлерді тиеу бойынша процедура уақытын қысқартады. «Қазақстан астықты экспорттау бойынша әлемде ірі он елдің қатарына кіреді. Жыл сайын 8 млн тоннадан астам бидай экспортталады, сондықтан пилоттық жобаның сәтті жүзеге асуы астықты жөнелту көлемін арттыруға мүмкіндік береді», - деп мәлімдеді Е. Кулаков. Е. Кулаков сондай-ақ, Ляньюньган портындағы логистикалық терминалдың бірлескен жобасы Қазақстанның Қытайдағы ірі инвестициялық жобасы болып табылатынын атап өтті.