Мәселенің бәрі маңызды

Кеше Қазақстан Бокс федерациясының президенті Тимур Құлыбаевтың төрағалық етуімен осы ұйымның жылдық қорытындысына арналған мәжіліс өтті. Мәжілісте федерацияның өт­кен жылғы жұмысы, төрешілер мен бапкерлердің қызметі, ерлер және әйелдер арасында өткен ел чем­пионатының қорытындысы, елімізде алғаш рет ұйымдастырылған әйел­­дер арасындағы Азия чем­пио­наты, «Астана арландары» кә­сіп­қой спорт клубы» ЖШС-нің қыз­меті мен басқа да мәселелер қаралды. Осы мәселелер бойынша жиын­да федерацияның басшылары сөз сөйлеп, атқарылған жұмыстар ту­ралы кеңірек мәлімет берді. Онда ерлер және әйелдер арасында өткен халықаралық, елішілік жарыс­тар­дың нәтижелеріне жоғары баға берілді. Мәселен, боксшылар ара­сын­да бәсекелестікті арттыру үшін өт­кен Қазақстан Бокс федера­ция­сы­ның кубогы жолындағы жарыстар мен басқа да турнирлерге мамандар тарапынан лайықты баға берілсе, жиынға қатысушылардың бәрі Бүкіләлемдік бокс тұжы­ры­мы бойынша кәсіпқой бокс­шы­лардың арасында өтіп жатқан жа­рысқа қатысу үшін құрылған «Ас­тана арландары» ұлттық құра­ма­сының нәтижелерін бас бармақ­пен бағалады. Естеріңізге сала кетсек, «Астана арландары» командасы жақын­да Оңтүстік Кореяның «Қызыл қанат­тылар» боксшыларымен кездесіп, 3:2 есебімен жеңіске жетті. Сөйтіп, «арландар» жартылай фи­налға жол­дама алса, оның құра­мындағы Қ­а­нат Әбутәліпов пен Ер­жан Мү­сә­піров Олимпиада жол­дамасы үшін күресу мүмкіндігіне ие болды. Ал әуесқойлар арасында өткен соңғы жарыста Қазақстан құрамасы 3 алтын жүлдені жеңіп алды. Баку қаласында өткен халықаралық турнирге барған 10 боксшының ішінде Мәди Шолақов (55 кг.), Ғани Жайлауов (60 кг.) пен Бақытжан Қожа­беков (69 кг.) алтыннан алқа тақты. Дегенмен, бокстағы осындай көңіл көншітерлік нәтижелер ай­тылғанымен, мамандар балалар жә­не жасөспірімдер, жастар боксын, спорттық медицинаны дамытуда, төрешілер мен бапкерлер қызметін жетілдіруде кемшіліктердің бар екенін жасырмады. Осы мәселеге бай­ланысты бірнеше ұсыныстар жа­сал­ды. Мәселен, федерация бас­шы­сы Тимур Құлыбаев Қы­тай­да әрбір боксшыны жарысқа дайын­дау үшін онымен төрт дә­рі­гердің, ал бізде бір ғана дәрі­гердің жұмыс істейтінін ай­тып, алдағы кезде біздің елде де бір боксшымен бірнеше адам жұмыс істеу керек деген ұсынысын білдірді. Сондай-ақ, мамандар балалар мен жасөспірімдер боксын қол­дау үшін Бокс академия­сы­ның құ­ры­лысын тез­детіп, онда жастардың бойын­дағы қабілет-дарынды ашу үшін бар жағдайды жасау керектігін ескертті. Сонымен бірге, мәжілісте осы жы­лы Астанада тұңғыш рет кадеттер арасында өтетін әлем чем­пио­на­тына дайындық, 2013 жылы ересектер арасында әлем чемпионатын өткізу, Лондон Олимпиадасына жолдама алу мәселелері қаралды. Дастан КЕНЖАЛИН.