Жандану

Жәрмеңке Бұдан екі жыл бұрын Шығыс Қазақстан облысының әкімі Бердібек Сапарбаевтың бастамасымен «Туған ел – алтын бесігім», «Туған жерге тағзым» акциялары дүниеге келген еді. Оның аясында облыстың барлық қалалары мен аудандарында арзан бағамен азық-түлікті саудалау, өнер­паз жастардың ел арасында жиі бо­лып, ән мен күймен сусындату, ұлт­тық салт-дәстүрді жаңғырту, Өске­мен және Семей қалаларында әр ап­таның сенбісінде жәрмең­ке өтуде. Өткен аптада Өскемендегі Республика алаңында Зайсан ауданы қо­жа­лық иелерінің өндірген азық-түлік жәрмеңкесі болып өтті. Зайсан­дық­тар 80 ірі қара, 2 түйе, 30 қой етін, 5 жылқы етін, 8 тонна картоп пен 2 тонна қырыққабат, 2 тонна өсімдік майын, 1 тоннаға жуық талқан, тары, жент, құрт-ірімшік, басқа да тауар­ларды алып келді. Зайсан ауданының әкімі Серік Зайнулдин атқарып жат­қан істері жайлы әңгімелеп берді. – Өткен жылы ауылшаруашылық өнімдерін өндіру көлемі 4 млрд. 300 миллион теңгені құрады. Қазір ауданда біршама игі істер атқарылып жатыр. Атап айтқанда, жеке кәсіпкер Айдар Барысов Зайсан қаласында сүт зауытын ашу мақсатында жаңа қондырғыларды орната бастады.  «Жол картасы» бағдарламасы аясын­да ауданда қыруар шаруалар жүзеге асырылып, мектептер ағымдағы жөн­деуден өтіп, абаттандыру жұмыстары атқарылды. «Балапан» бағдарламасы аясында аудандағы ауылдарда бала­бақша, шағын орталықтар ашылып, жұмыс істей бастады. Өңір басшысы Б. Сапарбаев Сарытеректегі бала­бақ­шаның, Дайырдағы мектеп-интер­нат­тың ашылу рәсіміне қатысып, жұрт­шы­лықтың қуанышымен бөлісті. Табиғаттың тосын апатынан зардап шеккен Тасбастау ауылына Бердібек Сапарбаев бірнеше мәрте келіп, халықпен жүздесуі, қиын сәтте олар­дың жанынан табылуы, тұрғындарды жағдайдың оң болуына сендіруі ел қамын ойлаған нағыз басшының үлгісі емес пе! Тасбастаулықтар жаңа баспаналарға ие болып, апаттан кейінгі ауыл тікелей өңір басшысының қамқорлығы арқасында қайта түледі. – Ауылшаруашылық құрылымда­рына көктемгі су тасқыны кезінде шығынға ұшыраған мал басының орнын толтыру мақсатында мемлекеттен 19 млн. теңге қаржы бөлініп, жеңілдікпен несие берілді. Халық­тың еңсесі көтеріліп қалды, мұндай жәрмеңкелер тұрақты өтіп тұрады, – деді аудан әкімі Серік Зайнулдин. Таңғы сағат 9-да облыс әкімі Бердібек Сапарбеков жәрмеңкені аралап, қожалық иелерімен әңгімелесті. Кең­сай ауылдық округінің әкімі Жетпісбай Әбдірахманов жәрмеңкеге алты ірі қара, екі жылқы, бес қой етін отыз қап картоп әкелгенін айтты. Ірі қара етінің 1 килосы 700 теңге. Ал, кар­топ­тың 1 килосы 60 теңге. Дәл сол күні орталық базарда ірі қара еті мен картоптың бағасы 2 есе қымбат болатын. Аудандағы ірі қожалық иесі Ербол Келгенбаев тіркемесі бар «Ка­м­аз»-бен 30 ірі қараның етін әкеліпті. Ал, түйе етін қала тұрғындары әп-сәтте талап алып кетті. Өңір бас­шы­сы, аудан әкімі Серік Зинабекұлына бүгінгі жәрмеңкені жақсы ұйымдас­тырғаны үшін алғыс айтты. Сол күні Республика алаңында зайсандықтар әннен шашу шашып, «Тәуелсіздіктің 20 жылдығына – 20 игі іс» шарасы жайлы мағлұматтар берді. Жаңаша өткен наурыз Өткен жылы ауа райының қолай­сыз болып, бірқатар елді мекендерде су тасқыны болуы салдарынан зай­сан­дықтар Наурыз мерекесін атап өте алмаған. Әсіресе, Тасбастау ауы­лында апаттың салдарынан 30-ға тар­­та тұрғын үй жарамсыз болып қал­ған еді. Биыл Наурыз тойын мән­ді де сәнді атап өтудің реті келді. 21 наурыз күні «Шығыс сақи­на­сы» көлік дәлізімен Зайсанға қарай сапарға шықтық. Күн суық, қардың қалыңдығы былтырғыдан кем емес. Тарбағатай ауданы мен Зайсанның арасындағы күре жолды 1 метрге дейін қалың қар басып қалған. Мұның алдында қалың жауған қар мен дүлей боранның салдарынан жол екі күн жабық тұрған. Жолшыларға рахмет, табиғат сынынан абыроймен шығып, жолды тазартып үлгерген. Биыл зайсандықтар мерекені жа­ңа­ша сипатта өткізуді ұйғарыпты. Сол күні кешкілік мәдениет үйінде Наурызға арналған ән кеші болып өтті. Оның тұсауын белгілі айтыскер ақын Серік Құсанбаев кесіп, жырдан шашу шашты, есімі елге танымал әнші Шаһизада көп­ші­лікке өнер көр­сет­ті. Екі сағат бойы ән шырқаған Ша­һизадаға жұртшы­лық тәнті бо­лып, ризашылықтарын білдірді. Аудандық әкімдіктің алдындағы кең алаңда 30-ға тарта киіз үй сап түзеген. Әр ауылдық округ 2-3-тен киіз үй тігіпті. Оның өзіндік мәні бар. Наурызға арналған  киіз үйлер сайысында Зайсандағы Әлия Құс­ма­но­ва жетекшілік ететін № 11 кәсіптік лицейдің 8 қанатты киіз үйі бас жүл­дені жеңіп алды. Бұдан кейінгі жүл­делі үш орынға аудандық медицина­лық бірлестігі,  Дәуленов орта мектебі мен Айнабұлақ ауылдық округі, 2017-әскери бөлімі, Ломоносов орта мектебі, Қаратал ауылдық округі ұжымдары ие болды. Наурызда  аудандық денешы­нық­ты­ру және спорт бөлімінің бастығы Зайсанбек Қажановтың және «Сайхан» спорт клубының ұйымдас­ты­руы­мен орталықтағы шағын футбол алаңында тоғызқұмалақ, арқан тар­тыс, қолтірес, үстел теннисі,  гір кө­теру, бағанаға шығу, шахмат, дойбы сынды бірқатар спорттық ойындар ұйымдастырылса, Әуезов мектебі мен мәдениет үйі жанындағы спорт командалары өзара сынға түсті. Спорт мектебінде қазақша күрестен бә­секе тартысты өтті. Бұл жарыс­тар­ға ауыл, қала спортшылары қатысып бақтарын сынады. Тоғызқұмалақтан қыздар арасында І-орынды Нұргүл Әзірханова, ІІ-орынды Кәусар Ынты­мақ, ал ІІІ-орынды Алтынай Бақ­бае­ва жеңіп алды. Шахматтан ерлер арасында Қ.Ниғ­матулин мен Қ.Сағымжанов көш бастады. Оқушылар арасындағы бұл сайыста Ж.Қанатұлы, Е.Абзиев, Ә.Тұрысбеков тиісінше топ жарды. Қыз­дар ара­сын­дағы осы сында І ор­ын Т.Бейсен­баеваға, ІІ орын Ғ.Тас­қын­ба­еваға, ІІІ орын Е.Шалғын­бе­ко­ваға бұй­ыр­ды. Дәл осындай көрсет­кіш бойынша дойбы жарысында ұлдар арасында І-орынға Д.Қалелов, ІІ-ор­ынға Қ.Дәуітбаев, ІІІ-орынға А.Қау­ыл­беков тұрақтады. Қыздар ара­сын­да Г.Тас­қын­баеваға, Қ.Бидах­ме­товаға және Қ.Бауыржановаға ешкім тең келмеді. Үстел теннисінен қыз­дар ара­сында М.Оразова, Б.Оразова, Р.Оразбекова жүл­де­лі орындарды иеленсе, ұл­дар ара­сын­да О.Әбдиев, М.Рахимов, М.Егінбаев жеңіс тұғырына көтерілді. Наурыз мерекесінде Шаһизада әннен шашу шашып, өнерпаздар мың бұралып би биледі. Мереке күні көрші Қытай мем­ле­кетінің Шыңжан-Ұйғыр автоно­мия­лы районы Алтай аймағы сыртқы эко­номикалық сауда мекемесінің ор­ын­басары Жеңіс Қабдікәрімұлы, Шың­жан-Жиншину-Хуанти жауапкершілігі шектеулі сауда серіктес­ті­гінің ди­ректоры У-Го-Бин 10 тонна көкөністі екі есе арзан бағамен саудалап, тұр­ғындардың алғысына ие болды. Оңдасын ЕЛУБАЙ, Шығыс Қазақстан облысы, Зайсан ауданы.