Бәсекеге қабілеттілік бастаулары

Парламент Мәжілісіндегі «Жаңа Қазақстан» депутаттық тобы мен жастардың «Бай-Барыс» интеллектуалдық клубының мүше­ле­рі бірігіп «Болашақтың іргесін бірге қалаймыз!» Жолдауын жас­тардың көзқарасымен жаңаша талдаған дөңгелек үстел өткізді. Мәжіліс депутаты Людмила Хочиева беташар сөз сөйледі. Л.Н.Гумилев атындағы Еуразия ұлттық университетінің студенті Әлкей Марғұланұлы дөңгелек үстелге модераторлық жасады. Ол Қазақстан Республикасының халықаралық қоғамдастықтағы орны мен алдағы уақыттағы сыртқы саяси басымдықтарына ерекше тоқталып, оның ұлттық қауіпсіздікке, қоғамның дамуына, ең бастысы, мемлекетімізге әсері хақындағы сұрақтарға жауап ретінде «Сыртқы прагматизм – Қазақстан дипломатиясының негізі» деп аталатын тақырыпта баяндама жасады. Еуразия ұлттық универси­те­ті­нің студенттері Асхат Атау «Эко­номикалық даму арқылы сапалы даму жолында», Мүсілім Хасенов «Әлеуметтік модернизация» деген тақырыптарды талдап сөй­леді. «2020 жылға қарай бағыт­талған ғылыми-технологиялық дамуды сапалы жүргізу үшін Еуропа елдерінде, Жапония, АҚШ, Қытай және Ресейде қызмет тәжірибесінде Форсайт әдісте­ме­сі қолданылып келеді. Форсайттың мәні «болашақ жайлы ойлануда» ғана емес, болашақты талқы­лауда, оның көрінісін қалып­тас­тыру мен қабылданған үлгіге қол жеткізу жолында күш жұмы­л­дыруда. Бұл үдеріске ондаған, жүздеген, мыңдаған адамдар тар­тылады. Қандай да бір экономика секторының дамуы, немесе қала­дағы немесе облыстағы әлеу­меттік-экономикалық жағдайдың іс барысы соларға байланысты. Бір артықшылығы – ешқандай сыртқы мәжбүрлеу күшімен емес, табиғи түрде бағдар­ла­на­тын болады. Форсайт – қазіргі қоғам мүшелерін олардың жауапкершілігі арқылы сыпайы түрде «бірлесіп басқару». Қазақстан өз экономикасында бәсекеге қабілетті әртараптан­дыру саясатын ұстануы қазіргі заман талабына сай келеді, алайда елдің мүмкіншілігін ескере отырып, перспективада қай­тары­мы мол болатын салаларға басты күш жұмсалуы қажет. Әлемдегі ірі экономика сарапшысы Майкл Портер Қазақстанның әлемде бәсекеге қабілетті болуына мүм­кіндік беретін 5 басым саланы бөліп шығарды. Олар: мұнай хи­миясы, металлургия, мәшине жасау, туризм, атом энергетикасы. Дөңгелек үстелге қатысушы Мә­жіліс депутаттары мен клуб мүшелері баяндамашыларға сұрақ қойып, тақырыптарды кеңі­нен талқылады. Сондай-ақ дөң­гелек үстелде жастар саясаты, таза ауыз су мен тұрғын үй мәселелері де сөз болды. «Болашақтың іргесін бірге қалаймыз!» Жолдауын талдаған дөңгелек үстелге қатысушылар ұсынымдар қабылдады. Онда «Мемлекеттік жастар саясаты туралы» Заңды жетілдіру жайы да назардан тыс қалған жоқ. Бұл орайда ұлтты бәсекеге қабілетті ету бағытында тәрбиелейтін үл­кен бағдарлама қажет екені де атап көрсетілді.