Иранмен байланыс артады

Теһран қаласында Халықаралық Наурыз мерекесінің II жиыны өтті. Жиын 2010 жылы 18 ақпан күні  БҰҰ Бас Ассамблеясының 64-ші сессиясында қабылданған «Халықаралық Наурыз күнін атап өту туралы» қаулыға сәйкес ұйымдастырылды, деп хабарлады Қазақстан Республикасы СІМ-нің баспасөз қызметі. Осы халықаралық жиынға 30 мемлекеттің делегациясы, оның ішінде Иран, Түркімен­стан, Тәжікстан, Ауғанстан, Ирак, Армения президенттері, Түркия Премьер-министрінің орынбасары, Пәкстан Мәжілі­сі­нің төрағасы қатысты. Қазақ­стан делегациясын Қазақстан Республикасы Парламенті Мә­жі­лі­сі Төрағасының орынба­сары Жәнібек Кәрібжанов бас­қарып келді. Жиын салтанатты түрде өтіп, президенттер құттықтау сөз сөйледі. Наурыз мерекесін атап өтетін мемлекеттердің мә­де­ниет ұжымдары сахнада өз өнерлерін көрсетті. Наурыз жәр­меңкесі ұйымдастырылды. Жиында сөз сөйлеген Иран пре­зиденті М.Ахмадинежад: «Нау­­­рыз халықаралық жиы­ны­ның ұраны әлемде бейбітшілік пен әділеттілікке қол жеткізу үшін ұлттардың бірлігін нығайту. Наурыз адам баласына жарқын болашақ үмітін сыйлап, түрлі сынақтардан сүрінбей өтуіне кө­мек­теседі», –  деді. Жиын барысында Қазақстан делегациясының басшысы Иран Ислам Республикасының президенті М.Ахмадинежадпен кездесті. Ж.Кәрібжанов Иран басшы­лы­ғының Халықаралық Наурыз мерекесін жоғары деңгейде атап өту бағытындағы қызметіне оң баға берді. Қазақстан Президенті Нұр­сұл­тан Назарбаевтың тәуелсіз­дік­тің алғашқы жылдарында арнайы қаулымен Наурызды мемлекеттік мереке деп жариялап, күнтізбеге демалыс күні ретінде енгізгеніне, сондай-ақ,  Наурыз мерекесіне ха­лық­аралық мәртебе беру жөнін­дегі 2010 жылғы БҰҰ шешімін қолдағанына тоқталды. М.Ахмадинежад Қазақстан Президенті Нұрсұлтан Назарбаев­тың БҰҰ қаулысын қуаттағанына және қазақстандық делегацияның Халықаралық Наурыз мерекесінің II жиынына қатысқанына риза­шылық білдіре отырып, Наурыз­дың көрші мемлекеттердің ортақ мерекесі ретінде ұлттар бай­ланы­сының артуына себеп бо­ла­тынын жеткізді. Ол екі жақты қарым-қатынасқа тоқталып, Иран мен Қазақстан байланы­с­ының даму үрдісіне жоғары баға беріп, осы ынтымақтастық одан әрі нығая түседі деп сенім артты. Кездес­у барысында Ж.Кә­ріб­жанов Қазақстан Респуб­ликасы бас­шы­лы­ғы­ның Иранмен байланыс дең­гейін арт­тыруға жете  көңіл бөліп отыр­ғанын жеткізді. Екі мемлекет арасындағы сауда-экономи­ка­лық қарым-қатынасқа тоқта­лып, Өзен (Қазақстан) – Қы­зылқия – Берекет – Этрек (Түр­кі­менстан) – Горган (Иран) темір жол желісінің дер кезінде іске қосылатынына сенім білдірді. Сондай-ақ, Қазақстан ас­ты­ғын Иранға экспорттауды қолдады. Ж.Кәрібжанов Қазақ­станның индустриялық-ин­но­ва­циялық даму бағдарламасын іске асыру орайында ирандық компанияларды Қазақстанға инвестиция салуға шақырды.